Mientras gobierno di Nicolas Maduro a anuncia un aumento di salario minimo pa 1 di mei proximo, e tasa di cambio di dollar oficial flotante, cu gobierno ta bende a traves di subasta, a bay dialuna pasa te na nivel di e dollar paralelo.
Mientras cu den e subasta di dialuna a fiha e prijs di dollar (di DICOM) na 5.200 bolivar, e prijs di dollar paralelo riba e website dolartoday.com tabata 5.286 bolivar ayera. E prijs di dollar controla pa gobierno a sufri un aumento di 26% compara cu e ultimo publicacion anterior.
Den e subasta di dialuna pasa a ofrece 214.741,94 dollar cu un solo empresa participante (Todo Cauchos), cu a adkiri 1.250 dollar, mientras cu 440 persona natural a cumpra 8.905,12 euro y 203.462,92 dollar. Cu e nivel di cambio oficial nobo aki, e salario minimo mensual na Venezuela a keda na equivalente di 3,46 dollar.
Mientras tanto, prijs di Canasta Basico Familiar (CBF) di maart 2019 a keda na 2.491.159,29 bolivar, es decir, a aumenta cu 533.333,08 bolivar (29,6 salario minimo) cu ta 27,2% mas compara cu luna di februari 2019. Tabatin mester di 138,4 salario minimo mensual; y 4,6 salario minimo pa dia, 83.038,64 bolivar (22,44 dollar) cada dia pa cubri su costo di e canasta, mientras e salario minimo mensual ta equivalente di 4,86 dollar.
