(LaPatilla/Tankertrackers) – Segun datonan di Tankertrackers, exportacion di petroleo di Venezuela a suma un promedio di 390.000 bari pa dia (bpd) na luna di augustus 2022.

Esaki ta significa un caida di 18% compara cu exportacion na juli, cu a yega na 475.000 bpd segun cifra di Tankertrackers. E ta e segundo luna consecutivo di caida den exportacion. Na juni, segun cifra di mesun fuente, exportacion tabata na un promedio di 576.000 bpd. Desde januari te cu augustus 2022 e promedio di exportacion ta 478.000 bpd. Exportacion promedio di crudo na augustus pa China tabata 88% y pa Cuba 12% di e total.

Segun calculo di Interamerican Trends, valor di e crudo exporta ta representa un ingreso neto pa Pdvsa di US$ 423 miyon. Ministerio di Petroleo di Venezuela no ta publica cifra oficial di exportacion di e pais. Na principio di aña Ministerio di Petroleo di Venezuela a anuncia cu durante 2022 lo ta exportando un promedio di 830.000 bpd di crudo. Exportacion te awor na 2022 ta apenas 43% di e meta estableci.

E invasion militar di Rusia na Ucrania a altera notablemente e mercado di petroleo na Asia, unda exportacion di crudo Venezolano Merey tabata bay, cu a keda desplaza pa crudo Ruso y Irani. China y India ta obteniendo crudo Ruso na prijs di baratiyo, pa e urgencia cu Rusia tin pa bende su crudo cu no ta yegando mercado Europeo mas.

Nota: TankerTrackers ta un servicio online independiente cu ta sigui y ta informa tocante transporte di petroleo crudo na varios punto di interes geografico y geopolitico.

LEAVE A REPLY

Please enter your comment!
Please enter your name here