Venezuela: Con e impacto di un embargo petrolero lo ta?

(lapatilla.com/AFP) – Venezuela lo sufri un impacto catastrofico si Estadonan Uni concretisa e menasa di sanciona exportacion petrolero di e pais aki, si e no ta garantisa cambio politico, analistanan consulta pa AFP ta adverti. E posibel embargo a keda menciona pa e secretario di estado di Merca, Rex Tillerson, cu a bisa cu nan ta analisa opcion pa ‘mitiga’ e consecuencianan. Washington ya a aplica sancion contra presidente Nicolas Maduro y Alto funcionarionan Venezolano y a prohibi ciudadano y empresanan Mericano negocia debe cu Venezuela y su empresa estatal petrolero PDVSA.

Con esaki lo afecta Venezuela?
Merca ta e principal cliente di Venezuela, cu ta obtene 96% di su entrada di benta di crudo, y e industria aki ta enfrenta un caida severo di produccion, cu dificultad financiero como consecuencia. Segun e Agencia di Energia Mericano (EIA), Merca a ricibi di Venezuela como 600.000 bari diario na 2017, loke ta ekivalente na un tercio di e benta total di e pais aki. Pero esaki ta representa 75% di e cashflow di Venezuela, motibo pa cual un embargo lo ta e scenario pio imaginabel, e economista Cesar Aristimuño ta opina. E ta añadi cu un tercio di e produccion -di 1,6 miyon bari pa dia segun OPEC – ta destina na paga debe cu China y Rusia y na acuerdonan di cooperacion cu paisnan di region di Caribe (programa Petrocaribe). Otro parti ta alimenta e consumo interno, cu gasolin casi regala: un dollar di mercado preto ta cumpra 214.000 litro; un estimulo gigantesco pa e contrabanda di combustibel na frontera cu Colombia y Brasil. Ademas, Venezuela ta importa di Merca como 160.000 bari pa dia di crudo liviano pa procesa su petroleo pisa, cu e por obtene tambe di Argelia o Nigeria, aunke na un costo mas halto, e experto Orlando Ochoa ta remarca. E produccion Venezolano ta experimenta su collapse mas severo den 30 aña (excluyendo e welga petrolero entre december 2002 y februari 2003). Awendia e pais ta produci mita di loke tabata e caso un decada pasa. “Su cashflow lo deteriora mas ainda pa e caida aki y pa posibel sancionnan nobo”, e firma consultor Eurasia Group ta calcula. Aunke e prijs di crudo a mehora, cu crudo Venezolano na alrededor di 60 dollar pa bari actualmente, Venezuela y PDVSA a keda declara den default parcial caba pa pagonan di debe atrasa. Cu un economia den recesion desde 2014, e pais tin un debe externo di alrededor di 150.000 miyon dollar, di cual 30% ta coresponde na PDVSA. E firma consultor Ecoanalitica ta proyecta e entradanan di petroleo na 24.800 miyon dollar pa 2018, cu compromiso di debe cu mester paga di 8.000 miyon dollar.

Con esaki lo afecta Merca?
Di e compra total di crudo den exterior, como 8% ta bin di Venezuela. E sancionnan di gobierno di Donald Trump por bay den dos direccion: restringi su compranan for di Venezuela o frena e benta di crudo liviano, segun James Williams, di e empresa consultor WRTG Economics. Washington lo por tin Mexico y Canada como principal substituto pa e crudo Venezolano, sr. Williams ta añadi, ken ta resalta cu e importacion di Venezuela ta bahando. Tabatin un reduccion di 100.000 bari pa dia na januari di e aña aki. Pero restringi e compranan lo afecta e refinerianan manera CITGO, subsidiario di PDVSA, Valero Energy Corp, PBF o Philips, cu lo perde fuente di suministro y esey lo significa aumento den prijs di gasolin”, sr. Williams ta indica. Na 2017 Valero a anuncia medida pa reduci su dependencia di Venezuela y di OPEC, aunke Ochoa ta remarca cu e suministro pa e refinerianan Mericano na costa di Golfo di Mexico no ta facil pa reemplasa.

E ta viabel?
Departamento di Tesoro di Merca por fiha sancion petrolero cu aprobacion di Congreso; tambe medida di presion riba cumpradonan di crudo Venezolano. Pero incluso e gobiernonan cu ta critico di regimen di sr. Maduro ta rechasanan. “Mexico no ta bay impone sancion petrolero”, e secretario Mexicano di Energia, Pedro Joaquín Coldwell, a adverti, preocupa pa e repercusion cu e por tin riba e Venezolanonan y e paisnan di Caribe. Venezuela ta sufri di un hyperinflacion cu IMF ta proyecta na 13.000% pa 2018, y un escasez cronico di alimento y medicina. E situacion aki a provoca e exodo di mas di 500.000 persona pa e bisiña Colombia y 40.000 pa Brasil desde 2017, segun autoridadnan di ambos pais.

E ta pone Maduro ‘schaakmat’?
E impacto politico lo no ta berdad. “Esunnan cu ta kere cu e isolacion y e sancionnan ta afecta solamente e gobierno, ta confundi. E impacto anticipa ta demoledor pa economia y nos tur ta sinti esey, sin garantia di cambio politico”, Luis Vicente Leon, di e firma encuestado Datanalisis, a skirbi riba Twitter. Sr. Maduro, cu probabilidad di ser reeligi te 2025 den e eleccion di 22 di april (mientras tanto posponi pa luna di mei; red.), ta sigura cu e ta prepara pa posibel sancion. Como 75% di e encuestadonan a desaproba e mandatario, segun Datanalisis, pero casi 90% ta rechasa un embargo tambe. “E sancionnan mester hiba gobierno na mesa di negociacion, pero nan lo sede? Nan a demostra te awor un absoluto indiferencia pa e deteriora socio-economico rapido den e pais”, sr. Ochoa ta opina.