(NTN24) – Maske regimen di Nicolas Maduro ta insisti den no reconoce e Corte Interamericano di Husticia (CIJ), ayera dialuna e vice-presidente Delcy Rodriguez a yega Den Haag pa participa den e audiencia tocante e disputa di limite entre Venezuela y Guyana pa e teritorio di Esequibo.
“Nada di niun hende ta bay stop cu na Venezuela e 3D ta realisa e referendum consultivo,” el a afirma.
Guyana a rechasa e consulta convoca pa Venezuela, y a pidi CIJ pa stop e referendum. E corte a convoca un audiencia pa awe diamars. Entre e cinco pregunta di e referendum, ta cuestiona e Venezolanonan si nan ta di acuerdo “cu e posicion historico di Venezuela di no reconoce e hurisdiccion di CIJ pa resolve e controversia teritorial tocante e Guyana Esequibo.”
Venezuela ta reconoce como unico instrumento legal pa resolve e controversia aki e Acuerdo di Ginebra, firma na 1966 cu Reino Uni, prome cu e independencia di Guyana y cu ta establece basenan pa un solucion negocia.
Sinembargo, na 2018 Guyana a acudi unilateralmente na e CIJ, principal organo hudicial di ONU, pa pidi pa resolve e diferencianan. Despues, CIJ a declara su mes “competente” pa examina e disputa fronteriso cu ta bay back mas di 100 aña.
E tension a reactiva na momento cu september ultimo, Guyana a anuncia un ronda di licitacion di blokenan petrolero den region di Esequibo. Venezuela a condena e situacion y a desencadena un intercambio di mensahe diplomatico den cual ambos pais ta acusa otro di crea provocacion.
