Presidente de facto Nicolas Maduro a encabesa ayera mainta un acto militar den conmemoracion di 198 aniversario di Bataya di Carabobo, fecha riba cual ta celebra Dia di Ehercito na Venezuela, un evento cu no a conta, pa prome biaha, cu e habitual desfile militar pa via di medida di seguridad, mientras cu e crisis ta sigui pone presion riba e regimen Chavista.
Maduro a aparece mainta tempran ayera mainta na e campo di Carabobo hunto cu e cupula di e regimen, incluyendo Tareck El Aissami, Delcy Rodriguez, y su casa Cilia Flores, y a ser ricibi pa e alto mando militar consistiendo di entre otro general y ministro di defensa Vladimir Padrino Lopez y general Jesus Suarez Chourio.
Durante su discurso en conmemoracion di e Bataya di Carabobo, Maduro a crea otro mas di su comisionnan sin sentido, cual a haya e nomber “Comision Bicentenario pa haci un pais miho.”
“Ehercito ta uni manera nunca antes, nos ta bay pa batayanan nobo,”Maduro a sigura e tropa su dilanti, recordando un famoso consigna di e Forsanan Arma: ‘Leales siempre, traidores nunca’.
Tambe Maduro a sigui elabora riba e proximo batayanan cu e ta mira y a priminti cu pa 2021 Venezuela lo por conta cu cuatro miyon miliciano arma, cu ta dispuesto di lucha pa e asina yama “Revolucion Bolivariano, cu nan armanan integra den e strategia di defensa cu gobierno ta delinea.”
