Mientras e expectativa tabata cu dia 1 di mei lo tabata e dia grandi di manifestacion contra regimen di Nicolas Maduro, e situacion a explota un dia prome. Mainta tempran tabatin un concentracion dilanti di e cuartel di forsa aereo La Carlota, na Caracas, cu presencia di presidente Juan Guaido y e lider opositor recien libera di su aresto domiciliario, Leopoldo Lopez.
Guaido a haci un yamado na forsanan arma pa termina nan apoyo na gobierno di Maduro y reconoce su gobierno di transicion pacifico, pa yega na eleccion liber y democratico.
E represion contra e poblacion di Caracas cu a subi caya masalmente tabata brutal. Imagennan di un tanqueta cu a pasa deliberadamente riba civilnan na e lugar a bay rond mundo inmediatamente via medionan digital. E confrontacion a dura henter dia, cu mas di 80 herido. No tabatin morto pa lamenta na Caracas, si uno den otro region, y forsanan arma a haci uso di gas lacrimogeno y bala di rubber, aunke tambe tabatin caso di uso di bala letal, di parti di francotirador y di e asina yama ‘colectivos’, e forsanan paramilitar Chavista, cu pa gran parti ta move rond riba motorcycle.
E siguiente dia, ayera, e manifestacion di 1 di mei, yama cu bastante anticipacion, a continua y a conduci atrobe na confrontacion cu e cuerponan uniforma, apoya pa e paramilitarnan Chavista, na varios ciudad di e pais.
Tanto Maduro como Guaido a convoca pa manifestacion grandi pa dia prome di mei, pero e cantidad di hende cu a acudi no tabata e masa grandi cu a spera. Mientras cu diamars a registra por lo menos 80 herido y un victima fatal, ayera na Caracas tabatin menos herdio, pero si gran cantidad di persona afecta pa gas lacrimogeno usa pa e cuerponan uniforma.
Sin embargo, e mensahe di Guaido na su base tabata pa continua cu accion riba caya, den e dianan venidero. “Si e regimen a kere cu nos a yega na e maximo presion, nan ta kiboca,” Guaido a manifesta ayera.
