Mildred Camero, ken tabata e hues pricipal di e Comision Nacional Contra Uso Ilicito di Droga (Conacuid), di Venezuela, a sigura cu Hugo ‘El Pollo’ Carvajal, mayor general pensiona di Forsa Arma Nacional, tin un lista di tur militar involucra den actividad di narcotrafico.
“El Pollo tabata maneha henter inteligencia di e pais, tanto civil como militar. E conoce tur e rutanan via cual ta pasa droga pa yega Europa y Estadonan Uni, e sa unda e laboratorionan ta, e tin un lista di tur e militarnan narcotraficante, e sa tur cos encuanto e entre 240.000 y 300.000 tonelada di droga cu ta transita pa aña via teritorio Venezolano,” Camero a bisa den entrevista cu El Confidencial.
Corte Federal di Distrito Sur di Florida a acusa Carvajal di colabora cu un cartel Colombiano cu tabata opera den suroeste di e pais ey, pa cual gobierno di presidente Hugo Chavez a duna nan refugio como proteccion contra autoridadnan Colombiano.
Camero ta garantisa cu Carvajal a duna orden pa captura dos militar encubierto di Colombia na Venezuela, traslada nan pa sede di Servicio Bolivariano di Inteligencia Nacional, tortura y asesina nan.
Segun Camero, agencia DEA di Merca ta considera e captura na Spaña y e pedido di extradicion un cuestion tambe di honor. “El a saca nan di Venezuela na 2005 di forma violento. Hugo Chavez a duna nan 24 ora pa sali di e pais como persona ‘non grata’. DEA no ta pordona esey nunca.” Ademas Carvajal lo a manda mata un agente encubierto di DEA tambe.
