Proximo diadomingo Venezuela lo tin eleccion parlamentario, sin participacion di gran parti di oposicion. Fuera di e resultado cu lo keda cuestiona na gran parti di mundo, esey tampoco lo yuda crea un posicion cu mas perspectiva pa oposicion. Pa mayoria di pueblo, eleccion cu victoria previsible pa e regimen Chavista, no lo trece ningun cambio den e panorama economico, di amplio destruccion, mes o mas grave cu den otro casonan unda tabatin un berdadero guera, manera Siria o Yemen. Un analisis.

Venezuela ta den un caida economico imparable desde varios aña. Realmente e deterioro economico a bay man den man cu e surgimento di e regimen Chavista, pero specialmente despues cu e actual presidente ‘de facto’ Nicolas Maduro a tuma rienda di gobernacion na 2013, e caida a acelera, y durante e ultimo añanan tabata ademas den un spiral di hiperinflacion, cu tabatin un efecto devastador riba entrada di mayor parti di e poblacion, condenando nan na pobreza.

E inflacion tabata relaciona cu un caida drastico di produccion den practicamente tur sector economico. Di sector petrolero, mayor productor pa e pais di divisa, pa decadas riba 90% di tur exportacion y ganador di divisa, te na agricultura, sector pecuario, industria manufacturero, te na sector di servicio.Persecucion politico y un situacion economico precario a percura pa mas di cinco miyon Venezolano bay busca un mihor destino den exterior, causando un problema serio pa e paisnan bisiña, na promer lugar Colombia, causando e problema mas serio di refugiado den un pais no den guera.

Venezuela ta e caso mas spectacular di reduccion di su economia den historia moderno. Entre 2010 y 2020 tabatin algun aña di crecemento positivo, pero desde 2014 tin 7 aña sigui di reduccion di GDP, cu aña 2019 como esun mas grave, cu un decrecimento di -25,5%, segun CEPAL, mientras cu 2020 ta bayendo den direccion di -14% segun e mesun organismo. Den e periodo menciona Venezuela a perde alrededor di 75% di su GDP, algo inedito den historia mundial reciente.

Sector petrolero

E caida gradual di henter economia Venezolano a bay hunto cu e deterioro di e sector principal generador di beneficio y divisa, cu ta e sector petrolero. Desde entrada di gobierno Chavista na final di decada di 1990, unda Venezuela tabata produci ainda na nivel di 3,2 miyon bari pa dia (bpd), na 1997, a mantene un nivel di alrededor di 2,44 miyon bpd te na 2014, pero despues produccion a cuminza cay gradualmente. Despues di e huelga di fin di 2002/comienzo di 2003, cu a conduci na un despido masivo di gran parti di e personal experimenta, nunca mas Pdvsa a logra yega na su nivel di produccion anterior, y despues di entrada di Nicolas Maduro como reemplazante di Hugo Chavez, e caida grandi a cuminza. Regimen di Nicolas Maduro ta custumbra di acusa e sancionnan Mericano pa e caida di produccion, sin embargo e sancionnan a cuminza despues di surgimento di Juan Guaido como presidente interino, reconoci pa Merca, na 2019. Pa e tempo ey ya produccion di Pdvsa a collapse, y a baha caba na 1,1 miyon bpd na januari 2019. Na september 2020 produccion a mengua te na 390.000 bpd, un poco mas di 10% di e produccion na entrada di Chavismo.

E deterioro ta causa pa factornan manera falta di mantenimento y inversion nobo, perdida di personal tecnico adecua, entrada di maneho politisa (Chavista) y corupcion na gran escala, y un payroll di diezmiles di Chavista no emplea di berdad, cu a laga e compania sin recurso pa re-inverti. Dia 30 di september 2020 e propio Nicolas Maduro riba Twitter a pone bloqueo di Merca responsable pa e caida desde 2013, unda segun un grafico presenta pa Maduro mes, entrada di petroleo pa e pais a bay di US$56 biyon na 2013 te na un mero US$477 miyon na 2020.

Na e momento aki, segun fuentenan di e sector, no tin ningun plataforma di perforacion operacional na e pais, motibo pa conclui cu e caida di produccion lo sigui cay te posiblemente cerca di 300.000 bpd na 2021. Calculacion di recursonan necesario pa recupera e capacidad di produccion y refinacion di Pdvsa ta core den mas di US$200 biyon. Como agravante, e actual crisis y demanda debil pa petroleo, ademas di e avance anticipa di energia renovable den proximo añanan, ta pone Venezuela, cu reserva grandi di petroleo pisa y acido, den un desbentaha grandi, tumando na cuenta e disponibilidad grandi di crudo liviano y di poco acidez, cu ta pusha e crudonan mas pisa for di e mercado limita, y esaki di forma posiblemente definitivo. Esaki por pone un limite na e capital necesario pa lanta e industria na su nivel original. Y ta trece duda riba e posible papel di petroleo como motor economico pa futuro. E ‘window of opportunity’ pa Venezuela pa usa petroleo como motor economico principal ta exigi un salida di e regimen socialista, pero no tin indicacion di esaki, mucho menos despues di e probable eliminacion di e asamblea nacional den man di oposicion.

Otro sectornan igualmente a sufri di e decisionnan descabeya di custumber di socialismo rond mundo, cu a conduci na descapitalisacion den varios otro sector, tanto di industria como den sector agricola. Un ola di expropiacion a hiba na perdida di productividad, loke a obliga e pais na importacion di cuminda basico, manera maishi y ‘caraotas negras’. Kiebra di mayoria di industria, di paña y sapato te na auto, a haci cu na e momento aki e industria existente no ta mas cu 20% di loke tabatin. Segun cifra presenta pa e medio Infobae na october 2019, Venezuela tabatin na 1999 aida como 13.000 industria activo. 20 aña despues, cu Chavismo na poder, no a keda mas cu alrededor di 2.600 empresa industrial. Ademas, loke a keda ta operando mayoritariamente na alrededor di 20% di nan capacidad instala.

E destruccion di sector agricola tabatin un relacion estrecho cu e politica socialista di expropiacion di empresa y terenonan dedica na actividad agricola, cu a ocasiona cu hopi empresa a pasa den man di hende cu no tabatin e conocimento pa por maneha esakinan na un manera adecuado. E caida grandi den e sector aki a contribui grandemente na e inflacion cu a surgi den ultimo añanan, y a ocasiona tambe un dependencia mas grandi di importacion di cuminda, mientras e pais tabata produci cada vez menos divisa. Di su banda e regimen a usa e necesidad di importa cuminda pa condiciona ayudo alimentario na registracion politico cu e regimen, via e paquetenan di ayudo CLAP (Comite Local di Abastecimento y Produccion). Actualmente parti di e poblacion ta depende di ayudo internacional pa nan por come. Esaki sin embargo no ta suficiente y segun testimonio di diferente instancia, malnutricion y desnutricion ta alarmante. Segun e encuesta di condicion di bida (Encovi) haci recientemente, 79,3% di Venezolano ta biba den pobreza extremo, equivalente na 22 miyon ciudadano. Tambe 96,2% di e poblacion lo ta cay bao di e limite di pobreza caba.

Hiperinflacion

E caida di actividad economico y e escasez general cu a surgi di esaki, a habri caminda pa un di e casonan mas grave di hiperinflacion den historia moderno, comparable cu e casonan di Zimbabwe, Bolivia y Nicaragua. Principalmente den ultimo 5 aña, di cual tres aña, desde november 2017 ta registra como hiperinflacion (mas di 50% di inflacion pa luna) sin interupcion. Entre 2013 y 2019 a registra un inflacion acumula di mas di 5.395.536.286%. Esaki a destrui bon parti di clase medio na e pais, cu a mira nan entrada ainda razonable, reduci te na algun dollar pa luna, y pa no papia mes di esnan cu un ingreso menor, cu un salario minimo cu no ta yega ni na equivalente di un dollar.

Situacion sin salida

E actual siuacion ta principalmente uno sin salida ni perspectiva. E actual regimen, cu lo fortifica su posicion di poder despues di elimina oposicion for di poder legislativo, no por ofrece un salida economico di ningun forma. Di otro banda, no tin ningun salida tampoco pasobra no tin nada cu ta menaza e posicion di poder brutal cu e regimen ta eherce, tanten nan por keda conta cu e lealtad di forzanan publico arma, di cual e cupula ta parti di e conspiracion criminal cu a apodera di e pais. Ademas, e regimen ta fortificando su posicion di poder y control riba e poblacion a traves di asistencia di otro regimennan opresivo, manera Cuba, Rusia, China y Iran.

Ta parce logico cu despues di e supuesto ‘victoria’ den eleccion di diadomingo venidero, con grandi o chikito e participacion na e eleccion lo ta no ta relevante, lo cuminza un etapa di mas persecucion di tur oposicion contra e regimen, loke por tin su consecuencia pa un fluho mas fuerte di refugiado na e paisnan bisiña. Como un di e bisiñanan, cu ya ta alberga un grupo sustancial di ciudadano Venezolano, nos lo mester tene debido cuenta cu e posibilidad aki.

 

LEAVE A REPLY

Please enter your comment!
Please enter your name here