Gobierno di Cabo Verde ta reforzando medidanan di seguridad en torno di e comerciante Barranquillero Alex Saab, captura dia 12 di juni riba peticion di husticia Mericano, pa corupcion y labamento di placa, como ‘testaferro’ di regimen di Nicolas Maduro.

Segun e medio Colombiano El Tiempo fuentenan local ta señala cu gobierno di Cabo Verde ta considerando duna Saab e beneficio di “casa por carcel” mientras mester tuma un decision final si ta honra e peticion di husticia Mericano di extradita Saab pa Merca.

E motibo pa e medida aki ta cu e plazo a vence den cual un persona por keda preso mientras cu ta dicidi su caso den un proceso hudicial, den e caso aki e proceso di extradicion.

Segun El Tiempo gobierno Caboverdiano a pone Saab na altura caba di e intencion aki y awor mester defini cual lo ta su domicilio pa e periodo ey. Tin fuente ta mustra riba e sede diplomatico di Venezuela debi na su status special pa e regimen, cu ta un pasaporte diplomatico. Otro ta bisa cu por ta un cas cu ta huur o un piso di un di e hotelnan na Cabo Verde.

Mientras tanto, pa autoridadnan Mericano e situacion ta tumando un rumbo menos faborable, mientras autoridadnan Mericanoenvolvi ya tabatin nan agentenan na Cabo Verde pa cinco luna caba wardando e momento di entrega di Saab na nan, pa extradicion pa Merca. Di banda Mericano e interes ta grandi pa a traves di Saab haya sa mas y haya mas prueba contra e lidernan Venezolano di e delitonan señala di narcotrafico, labamento di placa, exportacion ilicito di oro y otro material costoso manera coltan, cu a bay pa Turquia, Rusia y Iran.