(LaPatilla) – Continuacion cu e lucha pa condicionnan electoral pa logra eleccionnan liber y husto tabata e punto comun y e ratificacion cu e Presidente encarga di Venezuela, Juan Guaido, e gremionan y e sectornan di e pais a haci diahuebs 13 di januari durante e reunion cu nan tabatin.
“Desde 2018 nan debe nos e eleccion presidencial y locual cu a trece nos na e crisis aki sin precedente cu Venezuela y su ciudadanonan ta biba. Sin duda locual a pasa na Barinas a duna un impulso na e lucha, pero nos mester tin cla cu e obhetivo ta logra eleccionnan liber y husto”, Guaido a bisa.
Den e reunion el a probecha e oportunidad pa aclara cu e referendum ta pa impulsa e eleccion presidencial for di tur angulo.
“Mi no ta akinan pa un stoel, ami ta akinan pa e pais. Mester tuma accion. E politica ta logra eleccionnan pa sali for di Maduro”.
Di nan parti e dirigentenan gremial y representantenan di e sectornan di e pais a coincidi den con fundamental e unidad entre tur e forsanan bibo y ciudadanonan ta pa sigui avansa cu e obhetivonan den corto, mediano y largo plazo.
Nan a bisa cu “e unico lider na Venezuela ta e pueblo y esey a keda demostra na Barinas dia 9 di januari”; nan a coincidi tambe cu mester tuma back e cayanan pasobra eynan ta caminda mester lucha pa Venezuela. Finalmente nan a ratifica nan apoyo pa Guaido como presidente encarga di Venezuela y di e Parlamento Nacional legitimo.
