Presidente interino di Venezuela, Juan Guaido, a ricibi ayera na Palacio Federal Legislativo Enrique Iglesias, asesor special di Union Europeo pa Venezuela, y a afirma cu e reunion aki “ta parti di un ofensiva cu ta inclui tur tereno.”

“Tanto Enrique Iglesias, como e Grupo Internacional di Contacto, di cual varios pais Europeo ta miembro, ta preocupa pa e crisis, pa e emergencia humanitario, pa e informe di Alto Comisionado cu tabata devastador,” Guaido a indica prome cu inicio di e sesion di Asamblea Nacional.

Guaido a enfatisa cu mester haci uzo di tur espacio pa logra un solucion pa e crisis y conflicto, y cu “mester pone un fin na e sufrimento di nos hendenan, pone un fin na e tragedia.”

Guaido a destaca cu nan tabatin contacto cu representante di forsanan arma cu kier pasa pa banda di Constitucion y di otro actornan cu anteriormente a apoya Hugo Chavez y Nicolas Maduro. El a pone como ehemplo Manuel Cristopher Figuera, Luisa Ortega Diaz, Hugo Carvajal, Miguel Rodriguez Torres, entre otro.

El a afirma cu tur e colaboracion internacional ta parti di un strategia, pa cual e ta sigura cu tin avance den resolucion di e conflicto.

“Nos tin awe e condicionnan pa logra construi un salida di e crisis y pa logra den nos ofensiva asumi tur tereno di lucha, no laga nos keda confundi, no laga nan dividi nos,” el a conclui.

 

LEAVE A REPLY

Please enter your comment!
Please enter your name here