Venezuela: Hugo Carvajal sperando decision di extradicion na Spaña

Hugo Carvajal Barrios, ex hefe di Direccion di Inteligencia Militar di Venezuela, lo keda den prizon provisional riba orden di husticia Spaño, despues di su detencion riba peticion di Estadonan Uni, cu ta investiga su presunto vinculo cu trafico di droga y financiamento di guerrilla di Farc na Colombia, segun e medio Spaño El Pais.

Carvajal, conoci pa su apodo El Pollo, ta un figura clave den investigacion di mafia na Venezuela, vincula na regimen di Nicolas Maduro. Pero Carvajal ya no ta cu e regimen mas. Maduro a acusa Carvajal di traidor pa reconoce Juan Guaido como presidente interino di Venezuela, na februari pasa. Aunke nunca el a haya respaldo di oposicion, Guaido a menciona Carvajal diasabra pasa, bisando cu e ta den “proceso di colaboracion” cu husticia internacional.

Su aresto a aumenta tension den circulonan gubernamental na Venezuela pasobra Carvajal por converti den un importante informante pa Merca pa loke ta e envolvimento di figuranan Chavista importante den narcotrafico. “Suheto manera Carvajal no ta haci movimento kens, e conoce e tereno unda e ta move. Su captura ta representa un mensahe cla pa e funcionarionan cu ta involucra den delito, incluyendo militarnan, cu tardi o tempran husticia lo yega na nan,” e abogado Alejandro Rebolledo, experto den prevencion di legitimacion di capital, ta opina.

Na e momento aki, e ex militar ta insisti den su inocencia y ta nenga su entrega na autoridadnan Mericano, segun Europa Press. P’esey e proceso di extradicion por tarda prome cu tin un decision definitivo, mientras su estado di preso ta motibo di preocupacion pa varios funcionario halto di e regimen Venezolano.

 

You May Also Like

Nicaragua: Luis Almagro ta pidi ‘madurez’ pa oposicion y gobierno 

E secretario general di Organisacion di Estadonan Mericano (OEA), Luis Almagro, a pidi ayera ...

Retraso pa entrega di hospital nobo

WILLEMSTAD – Tin retraso den entrega dje edificio di Hospital Nobo na Otrobanda (HNO) ...

Presidente di Cuba ta considera mensahe di Trump como ‘menasante’

Presidente Cubano, Miguel Díaz-Canel, a considera diamars pasa como ‘menasante y sinberguensa’ e mensahe ...

Colombia: ELN a ataca batayon di Ehercito cu explosivo

Un batayon di Ehercito Colombiano na e departamento di Arauca, frontera cu Venezuela, a ...

Guatemala: Consulta popular pa conflicto di frontera cu Belize

Aunke tur analista ta di acuerdo cu e participacion lo tabata minimo, 7,5 miyon ...

Brasil: Cantidad di morto a aumenta na 99 y 259 persona desapareci

En number di morto despues di e catastrofe minero di diabierna pasa na Brasil ...