(ElNacional) – E opositor Venezolano Juan Guaido a pidi diadomingo ultimo na e comunidad internacional evita e normalisacion di relacion cu e gobierno di Nicolas Maduro y mantene e presion. Esaki a traves di tur mecanismo di lucha posible pa logra eleccion liber na e pais.
“Nos no por normalisa relacion cu e dictadura di Maduro. Si nos kier evita e crisis migratorio of e cercania di Maduro cu e presidente di Rusia, Vladimir Putin y otro agentenan di instabilidad global, esey por wordo logra solamente cu democracia y progreso na Venezuela y e region,” asina e politico a bisa den un video publica ariba Twitter.
Guaido ken a biaha pa Miami dia 24 di april ultimo, cu ayuda di e Departamento di Estado Mericano, despues di denunica cu el a wordo obliga pa sali di Colombia pa e gobierno di Gustavo Petro, el a sigura cu den su reunionnan cu diferente politico di Merca el a hiba e mensahe aki y algun otro cu e ta kere ta fundamental.
El a pidi su aliadonan impulsa e eleccion liber y husto como solucion na e conflicto cu Venezuela ta pasando aden, cu enfasis special pa proteha esnan cu ta den tereno, pa e eleccion primario.
El a insisti tambe riba e importancia di mantene e presion internacional. El a considera necesario promove un acuerdo pa e nacion petrolero.
“E debate no ta entre elegi e sancionnan of negociacion, entre mobilisacion interno of respaldo diplomatico. Ban cmabia e ‘of’ ey pa un ‘y’. Primario y union, sancion y negociacion, mobilisacion interno y presion diplomatico, tur mecanismo di lucha ta importante,” el a remarca.
Ademas, Guaido a ratifica cu su intencion ta regresa Venezuela. El a indica cu el lo regresa ora cu ta sigur pe y su famia.
Mientras tanto, el a bisa, el lo sigui cu e agenda di reunionnan y cu el lo biaha pa Europa pa suma esferso den e comunidad internacional. Esaki cu e meta di evita cu Maduro lo alcansa e poder un biaha mas den e eleccion presidencial, premira pa 2024.
