An opposition supporter holds a sign reading "Return to democracy" at Bolivar Square in Caracas, on January 23, 2020, where a National Assembly session was cancelled. (Photo by Federico PARRA / AFP)

Lidernan opositor di regimen di Nicolas Maduro a adverti mediante un comunicado conhunto cu Venezuela ta riba caminda pa converti den un pais carente di libertad, despues di e ultimo accionnan cu e regimen, a traves di su Tribunal Supremo di Husticia, a tuma pa organisa eleccion sin garantia pa e demas partidonan.

“Nos como Venezolano a pasa via tur caminda y forma pa rescata e pais di mannan di infamia y crimen organisa transnacional. Nos a participa den tur forma di dialogo, negociacion, experimento electoral y hasta den simulacion constitucional. El a conduci na fracaso y a duna e regimen oxigeno,” nan a expresa.

E documento tabata firma pa Maria Corina Machado, coordinador di Vente Venezuela; Antonio Ledezma, ex-alcalde metropolitano di Caracas; Diego Arria, ex-representante di Venezuela na Nacionnan Uni; Humberto Calderon Berti, ex-presidente di Pdvsa; Carlos Ortega, presidente di Confederacion di Trahadornan di Venezuela; Enrique Aristeguieta, presidente di Gran Alianza Nacional; y Asdrubal Aguiar, ex-gobernador di Caracas.

E dirigentenan opositor a sigura cu Venezuela ta permanece bao control tactico di gobiernonan di Rusia, China, Iran y Cuba. Ademas tin presencia di e teroristanan di  Hezbollah, Hamas, FARC, y ELN cu ta explota e riquezanan di e pais.

E documento ta señala cu, mientras tanto, den e zonanan urbano di e pais e gruponan criminal ta eherce ‘poder disolvente’ cu ta impone violencia y mendicidad como sistema di bida.

“Berdad di Venezuela no ta acepta maquillaje. Mester haci un yamado na sensibilidad di tur y mustra e escandalo na mundo democratico, na e ora di berdad aki pa tur e paisnan cu ta biba suheto na cuarentena. Nos, e Venezolanonan, no por nos so, nos ta secuestra,” e lidernan ta declara.

Mientras tanto, e regimen a dal un paso mas suspendiendo via Tribunal Supremo e directiva di Primero Justicia, un di e baluartenan mas fuerte den lucha contra e regimen Chavista.