Regimen di Nicolas Maduro a pidi diasabra pasa Mexico, Bolivia, Uruguay y paisnan di Caricom pa reanuda e ‘Mecanismo di Montevideo’, un iniciativa cu a surgi como iniciativa di Uruguay y Mexico, pa trata di yega na un solucion pacifico na Venezuela, a traves di dialogo y negociacion.
Desde palacio Miralores el a pidi apoyo y acompañamento “pa un gran dialogo di paz” y “di entendimento entre Venezolano.” Di otro banda, e mandatario a haci un yamada pa stop e supuesto atakenan contra su gobierno. Sin embargo, ta e regimen mes cu ta reprimi e poblacion di manera violento. Den e cuadro aki cardinal BaltazarPorras a a haci un yamada na dialogo y paz, sin embargo tambe a condena e yamada cu Nicolas Maduro a haci na e asina yama ‘colectivos’ pa defende e revolucion, loke ta un incitacion pa violencia contra pueblo.
Sin embargo, oposicion di Venezuela, lidera pa presidente interino Juan Guaido, a bisa na varios oportunidad cu ta dialoga solamente si Maduro bandona poder, pasobra ta considera cu e mandatario ta “usurpando” presidencia despues di gana eleccion fraudulento.
Tambe diasabra Guaido a organisa manifestacionnan masal tanto na Caracas como na otro ciudadnan. Centenares di miles di persona a yena avenida Francisco Fajardo na Caracas mientras cu na Maracaibo cuerponan uniforma a termina e manifestacion cu gas lacrimogeno y otro medio pa kibra manifestacion. Guaido a anuncia pa proximo diaranson otro manifestacion masal contra regimen di Maduro. “Nos ta bay ta riba caya te ora nos logra libertad,” Guaido a bisa e masa reuni na Caracas.
