(ElNacional) – Nicolas Maduro a sigura diahuebs cu e pais ta conta cu suficiente vacuna pa inmunisa henter e poblacion contra COVID-19 durante e aña aki y e proximo.
“Afortunadamente nos tin suficiente vacuna pa reforsa full e poblacion Venezolano e aña aki y e proximo tambe. Vacunacion ta duna resultado”, el a bisa durante su speech na e aniversario di e mision Barrio Adentro.
E lider oficialista tambe a afirma cu e Venezolanonan a enfrenta e pandemia di coronavirus den un manera exitoso.
“Nos a haci un cuarentena ehemplar pa henter mundo y danki na Dios, nos pueblo y Barrio Adentro, Venezuela a enfrenta exitosamente e pandemia di coronavirus”, Maduro a indica.
Despues di dos aña di pandemia y segun e anuncio di e lider oficialista dia 13 di maart cu a pasa, na e pais a logra e vacunacion di 100% di e poblacion riba 18 aña di edad y mas di 60% di e poblacion di mucha y hoben.
E dia ey tambe el a afirma cu e pais a vence e pandemia danki na e vacunacion masivo cu a wordo realisa na e pais.
Te cu e fecha di awe, Venezuela a confirma 522.070 casonan di COVID-19, di cual 515.135 pashent a recupera exitosamente. Actualmente e pais ta registra 1.230 casonan activo y e cifra di fayecidonan pa motibo di e virus ta na 5.705.
