(ElNacional) – Mas di 100 dirigente regional y activistanan di Caracas a anuncia diasabra nan renuncia di e partido politico opositor Voluntad Popular, lidera pa Leopoldo Lopez y den cual Juan Guaido a forma e gran parti di su carera politico, asina ex-coordinador di e activistanan na e capital, Javier Gonzalez, a informa.
Segun Gonzalez a splica den un comunicado publica pa e grupo, e decision a tuma luga pasobra pa hopi tempo diferente falta di respet, desconocimento y separacion di liderazgonan politico y social a sucede cu durante añanan nan a traha a pesar di e silencio complice di e direccion nacional di dicho organisacion.
El a indica cu pa e grupo tabatin un desviacion di balornan di Voluntad Popular. El a sigura cu esey ta e motibo principal di e renuncia di mas di 100 dirigente nacional, parokial y activistanan.
“Semper tabata existi imperfeccionnan interno cu cual nos a lucha. Sinembargo, awe nos a yega na e punto cu nos no por sigui tolera e regimen di inhusticia y mal practicanan den cual e dia pa dia di e partido a bira”,asina Gonzalez a comenta, segun e comunicado di prensa.
No obstante e grupo a reconoce dirigente- y activistanan honesto y comprometi cu e cambio democratico cu ainda ta participa den e organisacion politico opositor.
“Nos compromiso cu e democracia y e pais a hiba nos na wordo persigui, agredi y menasa, pero akinan nos ta sigui lucha pa e libertad y e cambio necesario”, Gonzalez a bisa.
Voluntad Popular ta wordo dirigi pa e opositor Leopoldo Lopez, ken aworaki ta exilia na Spaña desde final di october di 2020.
