(LaPatilla) – Presidente di Federacion Medico de Venezuela (FMV), Douglas Leon Natera a denuncia diamars ultimo cu mas di 40 dokter a wordo deteni durante ultimo 10 dia na varios estado di e nacion, principalmente na Zulia, Monagas, Sucre, Aragua, Lara y Apure.
Natera no a duna detaye di e rasonnan cu autoridadnan a alega pa detene e dokternan ni ki tipo di delito nan ta wordo acusa.
Den luna di april Nicolas Maduro a declara un lucha contra loke el a denomina manera “mafianan hospitalario” y como e prome medida, el a ordena e incorporacion di inspectornan secreto na e centronan di salud pa vigila y gara e trahadonan cu, segun e ta bisa, ta horta material y medicamento.
For di e tempo ey, segun presidente di FMV, e trahadonan di salud, particularmente e dokternan, ta ricibi menasanan na tur hospital di Venezuela.
“Dilanti di tanto presion, tanto desprestigio cu e regimen aki kier pone riba e gremio medico, y e anterior tambe, pasobra nan a yama nos tur nomber cu nan haya gana, hasta esun ultimo aki di mafianan hospitalario, e ora nos tin un gran cantidad di dokter deteni”, el a bisa den un conferencia di prensa.
E federacion a entrega un escrito na Ministerio Publico y Defensoria del Pueblo den cual nan ta denuncia e situacion precario di e hospitalnan.
“Nos ta compronde cu e situacion hospitalario ta hopi dificil. Nos ta e dokternan y e ekipo di eynan ta trahando cu nan huña, sin nada practicamente, cu apenas un 2%, 3% di material. Na Zulia nan lo tin un ausencia di 97%, 98%, como tambe na Sucre, Monagas y na e 24 estadonan, esey ta e situacion cu Maduro a presenta y nos ta acept’e, nos ta exigi respet”, el a bisa.
