Un total di 23 preso morto y 14 oficial herida tabata e saldo di un enfrentamento den e Centro di Coordinacion Policial Jose Antonio Paez, na e sector Campo Lido di Acarigua, estado Portuguesa. 

E tiroteo a cuminsa despues di 10:00am despues cu e presonan a inicia un motin den e centro di detencion preventivo. Den e operativo a actua funcionario di Polis Nacional Bolivariano, di e Comando Nacional Anti-extorsion y Secuestro y di Polis di estado Portuguesa.

Fiscal Zair Mundaray, cu ta den exilio, a difundi riba rednan social un video den cual ta aparece un di e detenidonan cu un arma cortico y un granat den su man. E ta acompaña pa dos muhe cu, segun e homber tabata parti di e bishita. “Nos ta di bishita na Campo Lindo. Nos a papia cu nan pa por fabor nan para e tiramento,” un di e bishitantenan a bisa.

Despues e homber ta agrega: “Wak, doctora Raquel. Mi ta bay papia cla cu bo. Nan no ta bay drenta aki pasobra mi ta dispuesto di muri y bringa cu cualkier bruha cu yega aki. Aki nos kier paz y trankilidad. Ta nos bida y bida di e bishitantenan cu ta aki.”

Comentario riba rednan social ta sugeri cu tabata trata di bishita cu tabata keda drumi; un libertad cu e regimen penitenciario tabata permiti cierto presonan.

Autoridadnan hudicial a duna nomber di e agentenan herida, pero ainda no a divulga nada di e presonan cu a muri.