Nacionnan Uni lo duna nan decision siman entrante encuanto un resolucion presenta den cual ta exigi cu ta inicia un investigacion di e violacionnan di derecho humano na Venezuela, asina e Conseho di Derecho Humano di ONU a informa ayera.
E propuesta di resolucion, riba cual e 47 estadonan miembro di e Conseho lo mester pronuncia diahuebs o diabierna proximo, a ser presenta pa un mayoria di e paisnan di Grupo di Lima (integra pa paisnan Latinoamericando y Canada) como tambe pa otro pais, manera Australia, Islandia y Israel.
E texto ta pidi e Alto Comisionado di Nacionnan Uni pa Derecho Humano, Michelle Bachelet, pa sigui vigila e situacion na Venezuela, pero ta pidi tambe na e Conseho pa manda cu urgencia un mision di investigacion di e hechonan, pa un periodo inicial di un aña.
E obhetivo di e mision aki, si e keda acepta pa un mayoria, lo ta investiga e ehecucionnan extrahudicial, e desaparicionnan forsa, e detencionnan arbitario tortura y otro abuso cometi na e pais desde 2014.
E situacion di derecho humano na Venezuela ta obheto di critica fuerte di parti di e paisnan cu ta apoya Juan Guaido, pero tambe di parti di Bachelet, ken ta lamenta cu ainda ta existi tortura y detencion arbitrario.
E Alto Comisionado tambe a pidi Caracas, te awor sin exito, pa desmantela e cuerpo ‘Fuerzas Especiales de Accion’ (FAES), un cuerpo elite crea na 2017, acusa pa Nacionnan Uni di ta practica ehecucion extrahudicial. Sin embargo, nunca Bachelet a solicita un investigacion riba Venezuela, contrario na su predecesor Zeid Ra’ad al Hussein.
Den un conferencia na inicio di september, Bachelet a splica su enfoke y a destaca cu su obhetivo tabata habri den e proximo lunanan un oficina permanente di Alto Comisionado na Venezuela.
