Lider di oposicion Venezolano, Juan Guaido, a bisa ayera cu a duna aprobacion pa uza satelite pa busca guerrillanan crusando den e pais for di bisiña Colombia.
Colaboracion a cuminsa entre oposicion Venezolano y oficialnan Colombiano pa colecta inteligencia riba camponan di guerrilla, y avionnan cual Guaido a bisa nan ta uza pa transporta droga.
“Nos a mira grabacion di e gruponan aki gabando di nan armanan”, Guaido a bisa. “Nos ta enfrentando un problema hopi serio riba soberania Venezolano.”
Guaido ta buscando pa saca Presidente Nicolas Maduro for di su cargo, acusando e lider socialista di ricibi gruponan terorista di Colombia. Guaido tambe a urgi e forsanan arma Venezolano pa ‘saca inmediatamente’ e ‘gruponan terorista’ for di teritorio Venezolano.
Guaido no a ofrece detaye, manera ken lo colecta e imagennan di satelite. E ta reconoci como presidente interino pa Merca, Colombia y alrededor di 50 otro pais, cu ta considera eleccion di Maduro na 2018 como un fraude.
Maduro ta permanece na poder cu sosten di militar Venezolano y di aliadonan internacional, incluyendo Cuba, Rusia y China.
Presidente Colombiano, Ivan Duque algun dia atras a acusa Maduro di duna refugio na rebeldenan di Colombia, despues cu algun ex-lider a anuncia nan retorno na conflicto arma, aumentando tension entre e dos pais.
Gobierno di Maduro, cual ta considera Guiado un ‘titere’ di administracion di Trump, a acusa gobierno Colombiano di permiti tres campo di entrenamento paramilitar pa opera den su teritorio, cu meta di vence Maduro.
