Diputado Delsa Solorzano a declara den Asamblea Nacional cu e militarnan Luis de la Sotta, Igbert Marin Chaparro, Ruperto Molina y e civil Carlos Marron ta incomunica ya pa varios siman. “Lo ultimo cu a haya sa di nan ta cu nan tabata someti na tortura den un camber di castigo di DGCIM,” el a afirma.
Parlamento di Venezuela, cu mayoria grandi di oposicion, a denuncia diahuebs pasa e desaparicion forzoso di cuatro preso politico, mientras nan a exigi un señal di bida di e detenidonan aki di regimen di Nicolas Maduro. E legislado antichavista Delsa Solorzano a conta periodista cu bida di e cuatro presonan ta core peligro. Nan ta den e mesun prison, den instalacionnan di Direccion General di Contra Inteligencia Militar (DGCIM) unda recientemente e militar Rafael Acosta Arevalo a perde su bida na man di e torturadornan di e regimen. E diputado a bisa tambe cu esclarece e casonan aki “ta di urgencia pa Venezuela”.
A detene Marin Chaparro na maart 2018 bao acusacion di lidera un complot contra gobierno di Maduro. Ruperto Molina a keda aresta na mei 2018 pa presunto rebelion y traicion di patria, mientras cu De la Sotta a cay preso pa supuesto conspiracion na 2017 y Carlos Marron a keda deteni na april 2018, acusa di labamento di placa.
Sancion contra DGCIM
Vice-Presidente di Merca, Mike Pence a publica riba Twitter cu gobierno Mericano ta introduci sancion nobo contra funcionarionan Venezolano.
Pence a bisa cu ta impone sancion contra e funcionarionan responsabel di reprimi y tortura ciudadano inocente di Venezuela. Pence ta referi na e casi 7.000 asesinatonan cometi pa e regimen di Maduro den ultimo aña y mey.
E personanan sanciona ta General Rafael Ramon Blanco Marrero, Coronel Hannover Esteban Guerrero Mijares, Mayor Alexander Enrique Granko Arteaga y Coronel Rafael Antonio Franco Quintero, segun website di Departamento di Tesoro Mericano. Tur ta pertenece na DGCIM.
