Mirando e collapse economico y e sancionnan fuerte di gobierno Mericano, gobierno socialista di Nicolas Maduro a propone otorga participacion mayoritario y e control di su industria petrolero corporacionnan internacional grandi, un medida cu lo termina cu decada di monopolio estatal.

Representantenan di Maduro a tene conversacion cu e empresa Ruso Rosneft PJSC, Repsol SA di Spaña y Eni SpA di Italia. E idea ta pa permiti nan tuma na nan encargo e propiedadnan petrolero controla pa gobierno y restructura parti di e debe di e compania estatal Pdvsa, a cambio di activo, segun personanan cu conocimento di e tema.

E propuesta, cu por ofrece un alivio na e sector petrolero, cu ya ta hopi debilita, ta ainda den su etapanan inicial y ta enfrenta obstaculo grandi. Lo mester cambia ley Venezolano y tin desacuerdo encuanto e manera con pa financia e operacion. Di otro banda, e sancionnan di Washington ta prohibi cu cualkier empresa Mericano por haci negoshi cu regimen di Maduro sin un licencia. E sancionnan a kita animo di empresanan Mericano pa inverti na Venezuela.

Pa departamento di Tesoro di Merca cambia su politica ta casi sigur cu esey mester rekeri aprobacion di e lider opositor Juan Guaido, cu ta conta cu respaldo di Washington y ta presidente di Asamblea Nacional, cu mester aproba e cambionan di ley.

Aunke Guaido y oposicion ta na fabor di aumenta e participacion stranhero y inversion na Venezuela, nan no kier haci nada cu lo por yuda Maduro pa keda na poder. Nan ta poniendo presion pa e renuncia y permiti eleccion liber.

Efectivonan militar y policial ta trata desde inicio di aña pa mantene Guaido y su aliadonan opositor fuera di e edificio di Asamblea y a eligi un presidente nobo di parlamento, Luis Parra, sin quorum presente y por lo tanto ilegitimo. Guaido a keda reeligi na otro sitio pa un mayoria legal. E problema pa Maduro ta sigui igual, pasobra no ta e reconocimento na Venezuela ta importante, sino e reconocimento na nivel internacional.

Pdvsa y Rosneft no a responde riba un solicitud pa comentario. Repsol a nenga di duna comentario, igual cu Eni y Tesoro Mericano.