E mision pa determina hecho di Organisacion di Nacionnan Uni (ONU) a emiti un informe cu ta conclui cu e regimen di Maduro a comete crimen contra humanidad.

Despues di investiga mas di 200 caso di violacion di derecho humano di parti di polis y militar, e mision di ONU na Venezuela a formula un serie di recomendacion pa comunidad internacional cu ta incomoda e regimen:

Entre e recomendacionnan tin cu ONU ta pidi pa “Fiscalia di Corte Penal Internacional tuma na cuenta e necesidad di haci husticia oportunamente pa e victimanan di e crimennan investiga pa e Mision y esunnan cu ta bao di su consideracion”.

“E estadonan lo mester considera e posibilidad di inicia accion legal contra e individuonan  responsable di e violacion y crimennan identifica den e presente informe, conforme na su legislacion interno,” e texto ta bisa.

Ta pidi e regimen ademas:

Deroga e “Ley contra odio” di Asamblea Nacional Constituyente y para enhuiciamento penal a base di e ley ey, incluso contra disidente politico y periodista.

Para e retorica publico, incluso di autoridadnan di nivel halto, cu ta instiga violencia contra esnan cu ta expresa oposicion contra politica o accion di gobierno, incluyendo manifestante.

Asegura cu no ta kita inmunidad parlamentario a menos cu ta di acuerdo cu procedimento estableci den articulo 200 di Constitucion. Reestablece inmunidad parlamentario di e diputadonan cu no a keda kita di acuerdo cu e proceso aki.

Ehecuta inmediatamente orden hudicial di liberacion pendiente pa esnan cu ta deteni ainda a pesar di a haya decision di liberacion caba.

Caba inmediatamente cu uso di lugarnan di detencion temporal o clandestino y atende e situacion di esnan deteni den tal lugarnan.

Suspende miembronan di SEBIN, di DGCIM o di cualkier otro institucion mientras ta investiga nan pa tortura.

Desmantela FAES en vista di e cantidad halto di ehecucion extrahudicial realisa pa e cuerpo policial aki desde su creacion.

Para colaboracion cu colectivonan y cualkier otro grupo arma cu ta opera fuera di e structuranan di seguridad di estado, como tambe desarma y disolve nan.

Coopera cu e organonan di Organisacion di Estadonan Americano (OEA) y ehecuta nan decisionnan.

LEAVE A REPLY

Please enter your comment!
Please enter your name here