(AFP) – Secretario di Energia Mericano, Chris Wright a yega Venezuela ayera pa negociacion cu presidente interino, Delcy Rodriguez y ehecutivonan di industria petrolero tocante con pa utilisa e reservanan amplio di crudo na e pais.
Wright ta e oficial cu rango mas halto den administracion di presidente Mericano, Donald Trump, pa biaha pa Venezuela desde cu forsanan special Mericano a baha y captura lider socialista Nicolas Maduro dia 3 di januari.
Trump a sostene ex-vice-presidente di Maduro, Rodriguez como sucesor di e lider retira, bao condicion cu e cumpli cu exigencianan di Merca, incluyendo otorga Merca acceso na petroleo Venezolano y alivia represion estatal.
Dunando Wright bon bini na Venezuela riba X, embahada Mericano na e pais a bisa: “Bo bishita ta clave pa avansa e vision di [presidente Trump] di un Venezuela prospero.”
A agrega cu “sector priva Mericano ta bay ta esencial pa reforsa sector di petroleo, modernisa e red electrico y habri e potencial enorme di Venezuela.”
Un potret comparti pa e embahada a mustra Wright riba e tarmac na aeropuerto internacional Maiquetia, cual ta sirbi e capital Caracas, hunto cu e charge d’affaires nobo di Merca na Venezuela, Laura Dogu.
Venezuela ta sinta riba alrededor di un di cinco parti di reserva di petroleo mundial y antes tabata un proveedor mayor di crudo pa Merca.
Pero e tabata produci apenas alrededor di un porciento di e produccion total mundial di crudo na 2024, segun OPEC, pa motibo di añas di inversion insuficiente, mal maneho y sancion Mericano.
Washington a alivia sancion riba petroleo Venezolano luna pasa despues cu administracion di Rodriguez a pasa un ley habriendo e sector pa inversion priva.
Trump kier pa companianan petrolero mayor di Merca reconstrui e sector y reforsa produccion cu miyones di bari pa dia.
