(ElNacional) – Studiantenan di Universidad Central di Venezuela (UCV) a exigi Nicolas Maduro aumenta salario di e profesornan y di e becanan estudiantil. A haci e pedido diamars, despues cu e oficialista tabata na e Ciudad Universitario, na Caracas, for di unda el a anuncia un plan pa recupera e universidadnan di Carabobo y Anzoátegui.
“Maduro a firma y a aproba recursonan pa e pool, pa e auditoriumnan y pa e dak cu a collapse tres aña pasa y e dia di awe nos ta puntr’e: Ki dia e ta bay aumenta e salario di nos profesornan, cu no ta yega ni 30 dollar? Ki dia e ta bay aumenta e beca estudiantil?” Jesus Mendoza, presidente di Federacion di Centronan Universitario di UCV, a cuestiona.
E dirigente, den declaracionnan ofreci na prensa, tambe a dirigi e exigencia na Tibisay Lucena, Minister di Educacion Universitario.
“Sr. Maduro, kico abo por haci cu cinco dollar? Mi no ta kere cu bo salario di presidente ta di 40 dollar, cu ta locual un profesor titular ta gana; mi no ta kere cu e salario di e Sra. Tibisay Lucena ta di 30 dollar, cu ta locual un profesor assistent ta gana. Mi ta duda esey hopi. Mi ta duda cu algun familiar di boso, si e ta studia na algun universidad publico, por sostene su mes cu un beca, cu aumento di dollar aworaki, no ta yega ni cuater dollar,” el a agrega.
Mendoza a puntra ademas ki dia e autoridadnan Venezolano lo aproba e recursonan pa e comedor, cu no a habri ainda den e aña escolar aki, y pa e busnan di e cas di estudio, unda actualmente tin tres ruta so cu ta funciona. Aunke el a reconoce cu nan ta rehabilitando e infrastructura di UCV y habilitando e unidadnan, el a afirma cu a yega ora pa e 25 rutanan cu tabata funciona algun aña atras ta activo tambe.
