(AP) — Vuelonan opera pa Merca debolbiendo migrante deporta na Venezuela ta bay continua, a pesar cu presidente Donald Trump declarando cu mester considera e espacio aereo di e pais Sur Americano como cera.
Gobierno di presidente Venezolano, Nicolas Maduro diamars a anuncia cu e vuelonan bi-semanal ta bay continua despues di un solicitud di administracion di Trump. Esey ta reverti un anuncio di gobierno Venezolano diasabra indicando cu autoridadnan di migracion Mericano unilateralmente a suspende e vuelonan.
Un aplicacion pa vuelo y aterisahe entrega dialuna pa Eastern Earlines basa na Merca ta solicita permiso pa un yegada diaranson. Minister di Exterior Venezolano a publica e aplicacion diamars.
Venezolanonan regularmente a keda deporta na nan pais di origen e aña aki despues cu Maduro, bao presion di Cas Blanco, a elimina su politica di hopi tempo di no acepta deportado for di Merca.
Inmigrantenan ta yega regularmente na e aeropuerto pafo di e capital, Caracas, riba vuelonan opera pa un contratista di gobierno Mericano of e aerolinea estatal di Venezuela. Mas cu 13mil migrante a bay back te awo e aña aki riba vuelonan charter, di cual e ultimo a yega diabierna.
E vuelonan a continua a pesar di atakenan di ehercito Mericano contra botonan sospecha di trafica droga den oriente di Ocean Pacifico y cerca di costa Caribe di Venezuela.
Administracion di Trump ta bisa cu e atakenan ta dirigi contra cartelnan di droga, algun di cual ta bisa ta controla pa Maduro. Trump a bisa diamars cu Merca lo cuminsa haci atake riba tera pronto, maske e no a specifica unda y a bisa cu atakenan por sucede na paisnan apart di Venezuela, sugeriendo cu Colombia por mira atake militar.
“Bo sa, tera ta hopi mas facil, hopi mas facil. Y nos sa e rutanan cu nan ta tuma,” Trump a bisa na reporteronan mientras el a reuni cu su Gabinete na Cas Blanco. “Nos sa tur cos di nan. Nos sa unda nan ta biba. Nos sa unda esnan malvado ta biba. Y nos ta bay cuminsa esey pronto tambe.”
Despues, ora a puntr’e pa elabora, Trump a bisa cu e tabata papia di paisnan cu ta produciendo y bendiendo cocaina of fentanilo. E presidente a bisa cu el a tende cu Colombia ta produciendo cocaina y bendiendo esaki na Merca. Colombia, en berdad, ta e productor top di cocaina na mundo. “Cualkier persona cu ta haciendo esey y bendiendo e den nos pais ta suheto na atake,” Trump a bisa.
El a agrega algun momento despues: “No djis Venezuela.”
