(AP) — Ayera, Venezuela a prohibi yegada di vuelo for di bisiña Colombia, despues cu autoridadnan a detene mas cu 30 persona cu tabata planeando actividadnan pa desestabilisa e pais.
Minister di Interior, Diosdado Cabello a bisa cu e prohibicion tabata “inmediato” y lo dura te despues di diadomingo, ora votadornan na e pais ta spera di eligi gobernador y miembronan di Asamblea Nacional.
Cabello a bisa cu e plannan anti-gobierno a involucra pone explosivo na embahadanan y otro facilidadnan na Venezuela. El a bisa cu autoridadnan a detene 21 Venezolano y 17 stranhero, algun di ken tin nacionalidadnan Colombiano, Mexicano y Ucraniano.
Sin duna evidencia, Cabello a bisa cu e grupo tabata inclui experto den aparato explosivo, traficador di hende y mercenario, y tabata trahando cu miembronan di oposicion Venezolano.
“E escenario cu nan kier presenta ta cu no tin condicion na Venezuela pa tene un eleccion,” Cabello a bisa, referiendo na oposicion.
Oficinanan di minister di Exterior Colombiano y presidente Gustavo Petro no a responde inmediatamente na un solicitud pa comentario. Petro, e prome presidente iskierdista di Colombia, a reanuda e relacionnan diplomatico di su pais cu Venezuela despues di a asumi su cargo na 2022 y bira un aliado di presidente Venezolano, Nicolas Maduro.
Maduro, durante un reunion cu lidernan di ehercito y forsanan di seguridad estatal, transmiti riba television, a alega cu miembronan di un organisacion criminal di Albania, involucra den trafico di droga na Ecuador, tambe tabata vincula na e supuesto plan, y a agrega cu un investigacion riba e plannan di e grupo ta andando.
Lider di oposicion, Maria Corina Machado, a haci un yamado pa Venezolanonan boicotia e eleccion programa pa diadomingo, casi 10 luna desde e eleccion presidencial cu autoridadnan electoral a bisa Maduro a gana, a pesar di evidencia creible di lo contrario. Varios pais no ta reconoce e victoria di Maduro, y a kibra relacion diplomatico cu su gobierno, afectando biahe aereo comercial.
Mientras Cabello a anuncia e arestonan ayera, un panel di experto independiente, cu sosten di Organisacion di Estadonan Americano, a publica un rapport documentando abusonan di derechonan humano cu a sucede na Venezuela, mientras gobierno di Maduro a reforsa su accion contra disidencia despues di eleccion presidencial dia 28 di juli.
E panel a reporta cu e periodo post-eleccion a mira “e fase mas severo y sofistica di represion politico den historia moderno di Venezuela.” Esaki ta inclui ehecucion di manifestante no-arma, desaparicion forsa y un aumento den detencionnan forsa. E panel tambe a reporta cu e estado a expande su obhetivonan di represion mas leu cu oponentenan politico y defensornan di derechonan humano, door di bay tras di trahadornan di urna, testigo electoral, familiar di miembronan di oposicion, menor di edad, y otronan.
