Un informe di Comision di Relacion Exterior di Senado Mericano ta acusa China di fomenta un espacio cibernetico cu aire autoritario y ta afirma cu e regimen Chavista di Nicolas Maduro a probecha te maximo e hardware y servicionan Chines pa controla e Venezolanonan.

E informe, dirigi pa senador Democrata Bob Menendez, ta bisa cu Venezuela tin equipo di internet y di rednan mobil, sistema di monitoreo inteligente y tecnologia di reconocimento di cara desaroya y instala pa companianan Chines. Ademas funcionarionan di gobierno a biaha pa China pa participa den seminario encuanto maneho di informacion.

E informe ta bisa cu “e regimen ta usa e tecnologianan aki pa censura y controla su criticonan bloqueando plataforma di rednan social y contenido politico, usando comentarista pro-regimen pa manipula discusion online, y pa detecta y detene e criticonan di gobierno y accede na e datonan di organisacionnan di derecho humano”.

Segun e documento e compania Chines di telecomunicacion ZTE a yuda gobierno pa crea e Carnet di Patria di Venezuela, un tarheta cu criticonan a denuncia pasobra e lo ta sirbi pa eherce mas control social riba e poblacion.

Di acuerdo cu empleadonan di e entidad cu ta maneha e sistema di tarheta, e database ta warda fecha di nacimento, informacion familiar, dato di empleo y entrada, propiedad, historial medico, beneficio ricibi di gobierno, presencia riba rednan social, afiliacion na partido politico y registracion di votacion.

ZTE tambe a respalda regimen di Maduro pa construi seis centro di respuesta di emergencia den e ciudadnan grandi y pa centralisa vigilancia riba video di gobierno.

 

LEAVE A REPLY

Please enter your comment!
Please enter your name here