Porfin por nota cu na nivel di seguridad nacional di Reino a yega e momento pa un situacion cu nos a señala na varios ocasion den ultimo añanan. Ta trata di e preocupacion pa e menaza cu regimen di republica di Venezuela ta representa den nos region, y como bisiña directo esey ta conta mas ainda pa e islanan ABC, di cual nos ta mas cerca di nan. Cu actualmente e asunto ta mas tenso cu nunca nos por ripara na e recomendacion pa como ciudadano Hulandes no biaha mes pa teritorio Venezolano. Nos no por corda un situacion den historia reciente cu a yega na tal recomendacion.

Awor si tin indicacion di un situacion mas tenso, cu e intensificacion di e militarizacion di peninsula di Paraguana, manera a keda publica ayera den medionan oficial militar Venezolano, di cual un resumen den e edicion aki. No por exclui cu e intensificacion di e militarizacion na Paraguana tin algo di haci cu e situacion di tension actual cu gobierno Hulandes, ya cu ta haci un yamado (nobo) pa un colaboracion mas intensivo den e area pa combati narcotrafico Colombiano. Esey ta algo remarcable, pasobra militarizacion di e peninsula no ta algo cu ta surgi awor so, sino algun aña pasa caba a capta atencion, den e medio aki tambe. Na e momento ey ya tabata conoci e realidad di salida di droga di origen Colombiano via Venezuela, cu conocimento y colaboracion di e regimen Venezolano mes. No tabata straño anto cu den añanan reciente tabatin noticia na Venezuela mes, cu hasta tabata relata di operacion di cartelnan Mexicano for di Paraguana, hustamente unda e regimen supuestamente lo a ‘fortifica’ su vigilancia. Nos ta hayando awor anto un ronda nobo di asina yama intensificacion di nan vigilancia, pa cual nan kier colaboracion y coordinacion Hulandes?

Algo straño den e comunicacion militar referi ta solicitud di colaboracion di marina Hulandes, mientras lo ta mas logico pidi colaboracion di gobierno Colombiano, si ta trata di impedi narcotrafico for di Colombia. No ta ni menciona e pais grandi aki, cu supuestamente lo ta permitiendo salida anto di narcotico di su teritorio, mientras pa hopi aña caba ta usa teritorio Venezolano pa saca droga den direccion di norte di Caribe y Merca mes.

Pero e situacion actual den nos region no ta algo pa contempla for di e problema, sigur existente, di narcotrafico so. En general nos ta bibando den un era extraordinario, unda e menaza cu nos bisiña grandi por representa pa nos ta parti di desaroyo negativo na nivel mundial, cu ta crea un situacion posiblemente explosivo, sin cu nos directamente por influencia esey. Pa mas di 25 aña e regimen autoritario di Chavez, y awe Nicolas Maduro, ta un fiel miembro di e club exclusivo di regimen autoritario manera Rusia, Iran, Corea di Norte, Nicaragua y Cuba. Sobrevivencia di e regimen Venezolano ta depende di colaboracion cu especialmente Rusia y Iran, cu ta di importancia pa sostene e dictadura den sentido militar. Tin e actual tension cu especialmente gobierno Mericano, cu recientemente a termina e permiso di compania petrolero Chevron pa exporta crudo pisa mehora Venezolano pa Merca, loke a laga e regimen Venezolano cu menos opcion pa exportacion. Mas grave ainda ta e tension creciente cu bisiña Guyana, unda compania Mericano manera ExxonMobil tin inversion grandi den explotacion di petroleo dilanti costa di Guyana. Venezuela ta disputa posesion di parti di e teritorio di Guyana, incluyendo e lama dilanti e parti ey, unda e exploracion y mientras tanto tambe explotacion ta tumando lugar.

En general por bisa cu un conflicto cu por bay for di man den sentido militar ta mas probable na Guyana, cu envolvimento Mericano, compara cu un problema cu Hulanda pa motibo di incidente den e supuesto ‘colaboracion’ pa combati narcotrafico. Sin embargo, no mester exclui provocacion cu Hulanda, hustamente pasobra e no lo involucra Estadonan Uni directamente, sigur no cu e actual tensionnan dentro di NATO entre e aliadonan. En todo caso, situacion na otro parti di mundo por conduci na incidente provoca pa kita atencion di otro escenario, manera e situacion na Ucrania y Rusia, y e problemanan entre Israel y Merca contra Iran. Ta imposible semper predeci unda e siguiente conflicto ta surgi, sea espontaneamente o provoca.

Pa bolbe na e situacion entre Hulanda y Venezuela mes, no ta asina cu Venezuela tin algun reclamo encuanto e islanan ABC, manera ta e caso di Guyana. Den pasado Hugo Chavez a yega di referi na e islanan como parti di e plataforma continental di su pais, pero esey no a dura mucho, ya cu reclama e islanan lo significa renuncia importancia di e tratado di 1648 (Paz di Munster) entre Spaña y e 7 Provincianan Hulandes, cu a determina reparticion di propiedad riba y cerca di continente Americano, base pa e reclamo actual Venezolano di gran parti di Guyana.

Posiblemente e mayor peligro pa Aruba y e otro islanan no ta un incidente militar, cu no lo toca reconocimento di e islanan como genuinamente perteneciente na Reino Hulandes.

E problema ta nos futuro cu un ola creciente di inmigracion Venezolano, cu e pregunta clave riba mesa: si mester duna permiso di estadia fiho na tanto migrante, cu consecuencia di adquiri ciudadania Hulandes. Nos ta prepara pa un futuro, unda un mayoria di ciudadano cu doble nacionalidad ta pusha nos den direccion di ‘independencia’ pa despues uni ‘voluntariamente’ na e bisiña grandi? Esaki ta e preguntanan cu nos mester contesta pa nos mes, sigur en vista di un decision di amnistia general cu aparentemente ta pendiente.