Pa mayor parti di su bida, e unico yiu di presidente Nicolas Maduro a biba keto den sombra di su tata, purbando di dedica su mes na musica, hasta ora el a tuma stapnan tentativo den politica.

Pero Nicolas Ernesto Maduro Guerra awo ta drentando den luz politico. E ta campañando pa un asiento den Congreso Venezolano, e ultimo institucion cu tabata fuera di e garanan di partido socialista, den un eleccion diadomingo cu Merca y decenas di otro pais ta mira como un movida di su tata pa reforsa su poder ilegitimo.

E politico di 30 aña di edad – comunmente yama Nicolasito – a papia cu AP prome cu e votacion, tocante bida cu su tata como tambe pa rechasa acusacion di corupcion di Merca.

“Nos tin cuero diki, manera crocodil”, el a bisa tocante su criticonan. “Nan a bisa tur loke nan por pensa di mi, pero nunca tin prueba.”

El a bisa cu su interes den politica a cuminsa mientras e tabata studiante na e Universidad Politecnico Experimental Nacional di e Forsanan Arma Bolivariano.

Na 2017 el a keda eligi den Asamblea Nacional Constituyente, un cuerpo legislativo crea pa gobierno di Maduro pa evadi e Congreso controla pa oposicion, e Asamblea Nacional.

Maduro Guerra a bisa cu e ta cercano cu su tata. “E semper tabat’ey pa mi. Mi semper t’ey p’e”, el a bisa.

Y di su tata a bin su interes den politica. “Esey a pasa pasobra mi semper tabata cu mi tata mirando e den accion”, Maduro Guerra a bisa.

E lasonan politico di e presidente a trece acusacionnan di corupcion contra e yiu. Na 2019, Washington a sancion’e hunto cu otronan den circulo interno di e presidente. Secretario di Tesoro Mericano, Steven Mnuchin e tempo aya a acusa Nicolasito den un declaracion di beneficia di e corupcion di su tata a costo di miyones di Venezolano.

Cu un victoria congresional casi sigur, ta bin acusacion cu ta preparando Maduro Guerra como sucesor di su tata, igual cu Maduro a ser scogi pa un presidente Hugo Chavez na punto di morto pa ta su sucesor. Tambe ta trece cune acusacion di nepotismo.

“Tin biaha hende ta bisa esey”, e yiu ta bisa. “Mi no tin ningun aspiracion. Mi aspiracion ta pa sirbi.”

LEAVE A REPLY

Please enter your comment!
Please enter your name here