Presidente interino, Juan Guaido, a declara diasabra pasa na prensa cu cualkier iniciativa internacional pa resolve crisis politico Venezolano, manera esun proponi na Noruega, mester conduci na e salida di poder di e dictador Nicolas Maduro, y eleccion nobo.
“Nos ta gradici pa tur e esfuersonan pero aki nos ta cla y nan no ta bay confundi nos,” Guaido a indica, sigurando cu nan a responde positivamente riba e invitacion di Noruega pa “yega mas cerca na solucionnan cu ta bay via e cese di usurpacion, gobierno di transicion y eleccionliber.”
E lider opositor a sigura, ademas, cu e regimen ta “asina debil” cu “nan kier a manipula nos cu un dialogo; nos a bay riba invitacion di un pais amigo manera Noruega.”
Durante un acto na Guatire, el a pidi pa sigui avansa den e unico direccion cu oposicion ta canando: “gobierno di transicion y eleccion liber. “E dictadura ta derota, ban conkista democracia (…) A yega e momento di avansa pa logra libertad,” el a añadi.
Diasabra pasa Guaido el a encabesa un manifestacion na Guarenas, cerca di Caracas. Despues di e evento, gruponan chikito di opositor y Chavista a grita consigna riba caya, sin cu tabatin enfrentamento fisico entre nan.
Diahuebs pasa Guaido a revela e contactonan y a confirma cu tabata e di dos biaha cu Noruega a invita su representantenan y esunnan di Maduro, cu ken e ta hibando un bataya di casi cuatro luna na Venezuela, cu ta hundi den e crisis mas grave di su existencia, den e ultimo siman tambe cu un escasez serio di gasolin y diesel, cu filanan di mas di un dia na varios parti di e pais.
