Un veredicto recien di corte na Aruba a sacudi e industria di real estate na e isla, reafirmando e responsabilidadnan legal y etico di broker y agentenan den transaccion di propiedad. Corte di Prome Instancia na Aruba a haya Five Star Realty VBA – operando como Keller Williams Aruba – responsable di a duna informacion incorecto na un cumprador tocante restriccion di zona di un propiedad. E decision, duna dia 27 di augustus ultimo, no solo ta otorga daño na e cumprador, pero tambe ta genera pregunta urgente tocante standard profesional y responsabilidad den mercado local di real estate.

Un malentendido costoso
 E disputa a origina na momento cu SB Real Estate Aruba a cumpra un propiedad residencial pa Afl. 1.3 miyon cu intencion di us’e como short-term vacation rental (STVR). Segun documentonan di corte, e cumprador a comunica su intencion claramente na e agente bendedor, Keller Williams Aruba. Confiando riba siguransa cu e propiedad tabata adecuado pa vacation rental, SB a bay door cu e transaccion y a haci un deposito di casi Afl. 135mil.

Sinembargo, durante e etapa di financiamento, banco di e cumprador a haci su propio due diligence y a descubri cu e propiedad tabata ubica den un “woongebied met waarden” – un zona residencial cu balor cultural of ambiental. Bao di Ordenansa di Desaroyo Teritorial di Aruba (ROPv), un zona asina ta prohibi permiso pa alohamento y STVR. Den otro palabra, no por a usa e propiedad legalmente pa e proposito pa cual e cumprador tabata kier e.

Consideracion di corte

Corte a determina cu Five Star Realty VBA, operando como Keller Williams Aruba, a viola su deber di cuido legal door di duna informacion incorecto y engañoso. Den su decision (Caso AUA202301442, ECLI:NL:OGEAA:2025:255), e corte a bisa:

“KWA a faya den su deber di cuido pa SB door di informa SB incorectamente cu e propiedad tabata adecuado pa uso di vacation rental, basa riba locual SB a procede di buena fe pa drenta den e acuerdo di compra.”

Den otro paragraf clave, e corte a enfatisa un principio mas amplio:

“Un broker di benta ta actua ilegalmente pa cu un cumprador potencial si e broker ta faya di eherce e nivel di cuido cu por ser spera bao di e circunstancianan.”

E consideracion aki ta bay mas leu cu un solo transaccion – e ta establece un precedente importante pa responsabilidad profesional den mercado di real estate na Aruba.

Responsabilidad di un marca

E veredicto tambe ta lanta pregunta delicado tocante maneho di un marca y su responsabilidad. Five Star Realty VBA tabata opera bao di e nomber Keller Williams, un di e frankisianan di real estate mas grandi na mundo conoci pa su enfoke riba etica y deber fiduciario. Maske e veredicto no ta implica Keller Williams International directamente, e uso di e nomber global ta invita scrutinio.

Esaki a genera pregunta tocante e compania mama di frankisianan Keller Williams y nan responsabilidad pa sigura cu tur frankisia cu ta opera bao di e nomber ta cumpli cu e mesun expectativa di etica y profesionalismo.

Y esaki no ta conta pa Keller Williams so, sino henter e structural di operacion di frankisia di real estate, unda confiansa den un marca global por sconde falta di cumplimento of balor.

Un problema di industria

E pregunta mas serio cu a bin dilanti den e caso aki ta si e ta representa un eror isola of algo mas sistemico. Ley di ROPv di Aruba y rekisito pa permiso ta informacion publico, cu ta facil pa verifica a traves di canalnan oficial. Asina mes, por nota cu tin propiedad ta ser promovi of hasta bendi cu siguransa implicito of explicito di potencial pa STVR.

Si e informacion incorecto di un broker por resulta den un eror asina costoso, cuanto otro cumprador por ta dependiendo riba siguransanan similar? Y cuanto agente a tuma e tempo pa verifica, na lugar di asumi, cu e uso pa cual kier e propiedad ta permisible segun ley?

E veredicto, den e sentido aki, mester duna impulso na solo revision di cumplimento pero tambe reflexion cultural den e industria. Mester reevalua balans entre entusiasmo pa benta y compromiso cu due diligence.

Consecuencia
 Pa esnan cu kier cumpra propiedad, specialmente esnan drentando mercado di Aruba for di exterior, e conclusion ta uno directo pero vital: confia, pero verifica. Cumpradornan nunca mester depende exclusivamente riba e siguransanan verbal di e brokernan of materialnan promocional. ROPv, permiso y designacion pa uso di tereno mester keda verifica independientemente y por escrito door di un fuente oficial of cualifica. Contrata un abogado, appraiser of specialista na comienso di e proceso por preveni sorpresanan caro despues.

Pa broker y agente, e les ta mas profundo. E veredicto di Keller Williams ta reafirma cu due diligence profesional no ta djis un virtud moral – e ta un deber legal. Precision, transparencia y cautela no ta negociable. Den un mercado cu ta depende hopi riba confiansa, shortcut por destrui no solo dealnan individual, sino tambe e credibilidad di henter e profesion.

Te awo, Keller Williams Aruba no a duna un declaracion publico tocante e decision di corte. Si e compania tin plan pa apela, ainda no ta conoci.

Mientras tanto, e decision di corte ta keda resona dentro di e sector di propiedad di Aruba, generando yamado pa marco di cumplimento y conscientisacion tocante ROPv.

Pa legislador y regulador, e veredicto ta subraya e importancia di aplicacion consistente y conscientisacion publico. Pa brokernan, ta un recordatorio cu hasta marcanan bon conoci no ta immuun pa responsabilidad legal. Y pa cumpradornan, e ta un les valioso: due diligence no ta opcional, sino esencial.