Ayera riba rednan social publicacion di un video den cual por mira turistanan den un vehiculo UTV ta core riba santo blanco a causa controversia. Ciudadanonan local, como turistanan a reacciona cuestionando con esaki por ta posibel y si e compania cu ta huur e tipo di vehiculonan aki ta informa e turistanan unda mag y unda no mag core cu e tipo di vehiculonan aki.

Un usuario a publica e video riba un pagina di Facebook dedica specialmente na turistanan cu ta busca y comparti informacion di Aruba. Den e video por wak claramente con e turistanan aki ta core cu e vehiculo UTV riba santo blanco, na canto di lama.

Manera ta conoci ley ta prohibi pa vehiculonan di motor core riba santo blanco y den caso cu haci esaki toch, e persona por ricibi un boet significante.

Mesora usuarionan a expresa nan opinion den e seccion di comentarionan.

“Check cual compania di huur auto y yama polis” ; “Semper bo tin un di e cabesnan bashi ey” ; “Sentido comun mester bisa bo cu e no ta permiti,” ; “Wak e cosnan aki nan no ta wak. Mester coy e number y laga polis duna boet,” ta algun di e comentarionan cu usuarionan a publica expresando nan disgusto grandi.

Urarionan ta cuestiona si e doñonan di compania di huur vehiculo ta informa e turistanan na momento cu nan huur e tipo di vehiculonan aki unda ta permiti pa core. Doño di un compania di huur auto a expresa su punto di bista basa riba experiencia cu turistanan.

“Como doño di un compania di huur mi por bisa cu nos ta haci’e sinembargo, e actitud di hopi di nos bishitantenan no ta grandi. Bisa nan pa no hiba un Harley-Davidson bay Natural Bridge y probablemente bo por adivina unda nan ta bay prome,” el a indica.

E discusion riba vehiculonan ATV y UTV ta persisti pa añas na Aruba. Ambientalistanan ta bati alarma tocante e daño cu e vehiculonan aki ta causa na naturalesa. Entre otro door di directamente trapa riba animal y mata, pero tambe door di perturba e suelo natural causando entre otro, erosion.

Na 2021, e gobierno anterior di MEP-RAIZ a indica cu a institui un comision multidiscipliniario y un taskforce pa atende cu e problema di UTV/ATV. Na juli 2022, a señala cu a cuminsa cu trabao pa aborda maneho di UTV/ATV, cuminsando cu rutanan alternativa pa proteccion di nos naturalesa. Na 2024, a anuncia un proceso di transicion cu lo mester a dura tres aña.

E fase transitorio lo mester a cuminsa 1 di januari 2025 y lo mester termina na 2028, den cual e vision ta cu den 2028 tur compania a cambia nan actividad pa uno cu ta den harmonia cu naturalesa. Entrante 1 di januari 2025, lo mester a apunta tres ruta alternativo, regula desorden y velocidad, y alabes crea espacio di regeneracion di areanan di naturalesa afecta (natuurgebieden y natuur en landschap). Pa 2026 lo mester pone fondonan disponibel pa “micro transition loans”, unda companianan chikito por aplica pa yuda cu e transicion pa un otro negoshi. Pa sigui incentiva e transicion di e sector gobierno anterior a plania traha cu programanan di certificacion den cual ta reconoce companianan cu a demostra boluntad y curashi pa cuida naturalesa y alabes stimula actividadnan diferente.

Pero desde e tempo ey, no a tende mas for di gobierno tocante e proceso y kico tur realmente a ser logra.