https://www.youtube.com/watch?v=r0qtNh39U4E

Parti di e ciudad di Miami ta bao di awa mientras cu horcan Irma ta yegando tera na Florida. E tormenta ta actualmente na categoria cuater cu bientonan di 209km pa ora. Segun informe di BBC, e tormenta ta bay subi tera den un par di ora na e costa oost di Florida. E awa a subi te na 60cm na e districto financiero, unda cu por mira un caminda cu ta practicamente un riu aworaki. Mas cu 1 miyon di cas ta sin coriente, y mas cu 6.3 miyon di hende na Florida a wordo pidi pa evacua. Irma a laga basta destruccion den varios parti den Caribe cu mas o menos 27 morto. Algun hende na Florida no a bandona nan cas.

Gobernador di Florida Rick Scott ta preocupa cu e area di Tampa Bay, cual tin un populacion di tres miyon hende y no a wordo afecta door di horcan desde 1921. “Nos ta den haya un mokete den nos cara di e tormenta aki,” Burgemeester di Tampa sr. Bob Buckhorn a comenta.


Otro areanan cu a wordo afecta
Irma a bira e tormenta Atlantico di mas grandi den mas cu un decada, anto ya caba a causa destruccion total na varios isla Caribense:

Cuba: Oficialnan a papia di dañonan basta grandi, sin cu a duna mas detayes. Pero ningun persona a fayece. Ainda no tin coriente den e capital, Havana.

St. Maarten & St. Barthelemy: 6 di 10 casnan na st. Maarten ta inhabitabel segun autoridadnan Frances. Nan a laga sa cu 9 persona a fayece y 7 persona ta perdi den teritorio Frances, mientras cu 4 a fayece na e parti Hulandes.

Turks & Caicos Islands: Daño tur caminda, pero no ta conoci con grandi.

Barbuda: E isla chikito aki ta casi inhabitabel, cu 95% di su edificionan cu a wordo destrui. Prome minister di Antigua & Barbuda Gaston Browne a haci un estimado di 100 miyon dollar cu lo tin mester pa reconstruccion. Un persona a wordo confirma morto.

Anguilla: Daño extenso cu un persona confirma morto.

Puerto Rico: Mas cu 6.000 residente di teritorio Mericano ta den shelters y otronan ta sin coriente. Mas o menos 3 persona confirma morto.

British Virgin Islands: Hopi daño na infrastructura, cu 5 persona confirma morto.

US Virgin Islands: Hopi daño tambe na infrastructura, cu 4 persona morto.

Haiti & Republica Dominicana: Ambos a haya hopi sla di e tormenta, pero ningun a haya daño cu nan a spera cu lo por a haya.