Violencia contra mucha ta prevenible: Loke rapport di UNICEF–PAHO ta mustra y kico esaki ta nifica pa Aruba

Violencia contra mucha y hoben ta sigui ta un reto serio den henter Latino America y Caribe, hasta ora algun pais ta informa un bahada di e cantidad di crimen en general. Un rapport nobo publica recientemente pa UNICEF y e Organisacion Panamericano di Salud (PAHO) ta trece hunto e ultimo datonan regional riba violencia cu ta afecta hobennan y ta subraya strategianan proba pa preveni esaki.

Mientras cu Aruba no ta enfrenta e nivelnan extremo di violencia hubenil cu loke ta ser mira otro caminda den e region, e resultadonan di e rapport riba violencia arma, homicidio y disciplina violento ta ofrece un bista importante pa esnan cu ta traha politica, profesional y famianan riba e isla

E rapport ta mustra cu homicidio a keda un di e causanan principal di morto entre hobennan di 10 pa 24 aña na Latino America y Caribe durante e ultimo dos decadanan. Entre 2000 y 2019, casi 29% di mortonan den e grupo di edad aki tabata debi na homicidio. Aunke datonan di 2018 pa 2022 ta indica un bahada den e cantidad di homicidio bou di mucha homber di edad 15 pa 17, e nivelnan ta keda alarmantemente halto pa normanan mundial. Na mesun momento, e cantidad di mucha muhe den e grupo di edad aki cu a muri pa homicidio a subi entre 2021 y 2022, subrayando riesgonan emergente cu anteriormente a ricibi menos atencion

Situacion di Aruba ta diferencia significantemente for di esun di paisnan mas grandi afecta pa violencia arma cronico. Homicidio cu ta envolve mucha y hoben ta scars, y e isla ta beneficia di institucionnan social relativamente fuerte y un poblacion chikito y estrechamente conecta. Sinembargo, e rapport ta enfatisa cu violencia arma no mester ser comprondi solamente a traves di estadisticanan di homicidio. Exposicion na arma, actividad criminal y menasa di violencia por tin efectonan dañino riba muchanan hasta ora morto no ta sucede.

Den henter e region, muchanan tin biaha ta ser recluta den rednan criminal na edadnan hopi hoben, inicialmente pa haci tareanan di riesgo abou manera fungi manera vigilante, prome cu nan ser involucra den actividadnan mas peligroso. Mientras cu Aruba no ta experiencia reclutamento di menor di edad generalisa pa gang, su posicion den e region di Caribe ta pone cu tendencianan mas amplio—manera traficacion di droga y crimen organisa—ta keda relevante. E rapport ta enfatisa cu prevencion den hurisdiccionnan mas chikito ta depende hopi di identificacion trempan di riesgonan, compromiso cu comunidad, y sistemanan di sosten sostene pa hobennan.

E datonan ta mustra tambe cu mucha y hoben por ta tanto victima como supuesto autor di violencia letal. Entre 2015 y 2022, mas cu 10 mil menor di edad den henter e region a keda aresta of sospecha di homicidio, mayoria di nan mucha homber di edad 15 pa 19 aña. E rapport ta enfatisa cu hopi di e hobennan aki nan mes a ser exponi na violencia, negligencia of exclusion mas trempan den nan bida. Pa Aruba, caminda e cantidad di ofensa hubenil ta relativamente abou, esaki ta reforsa e importancia di mantene un sistema di husticia cu ta priorisa prevencion, rehabilitacion y reintegracion en bes di contesta punitivo.

UNICEF y PAHO ta mustra riba evidencia cla cu violencia arma cu ta envolvi mucha ta prevenible. Aplicacion fuerte di leynan di arma di candela, combina cu programanan di prevencion basa riba comunidad, a reduci homicidio di hobennan den varios pais. Iniciativanan cu ta enfoca riba mediacion, educacion, oportunidadnan di trabou y sosten di salud mental tabata particularmente efectivo.

Pa Aruba, e hallazgonan aki ta alinea cu inversionnan existente den desaroyo di hubentud, deporte, enseñansa, y programanan comunitario. E rapport ta adverti, sinembargo, cu esfuersonan di prevencion mester ser sosteni den transcurso di tempo. Hasta sociedadnan cu nivelnan abou di violencia por mira cambionan rapido si desigualdad social crece, presionnan economico aumenta, of sistemanan di sosten debilita.

Servicio di salud mental ta ser identifica manera un componente critico di prevencion di violencia. Mucha y hobennan cu ta presencia of experiencia violencia—directamente of indirectamente—ta enfrenta riesgonan mas halto di trauma, ansiedad y envolvimento den comportamento violento den futuro. E infrastructura di salud relativamente fuerte di Aruba ta provee un fundeshi, pero e rapport ta subraya e importancia di servicio amigable y informa riba trauma pa mucha cu ta accesibel sin stigma.

Mientras cu violencia arma ta haya hopi atencion publico, e rapport ta identifica disciplina violento como e forma di violencia mas comun contra mucha den Latino America y Caribe. Mas cu 60% di muchanan di 0 pa 14 aña den e region ta experiencia disciplina violento, mayoria biaha den nan propio cas of na scol. Agresion psicologico, manera grita, humilia of menasa un mucha, ta e forma mas prevalente, afectando casi mitar di tur mucha den e grupo di edad aki.

Aunke datonan specifico pa Aruba ta limita, cifranan regional di Caribe inclui den e rapport ta sugeri cu disciplina violento ta keda generalisa den estadonan insular cu contextonan cultural similar. Un resultado clave ta e buraco entre actitud y practicanan. Mientras cu relativamente poco dunador di cuido ta bisa abiertamente cu nan ta kere cu castigo fisico ta necesario, hopi mas mucha ta informa di a experiencia esaki. Esaki ta indica cu disciplina violento hopi biaha ta persisti como un comportamento normalisa en bes di un escogencia defendi conscientemente.

E consecuencianan ta significante. E rapport ta conecta disciplina violento cu salud mental mas malo, dificultadnan den siñamento, relacionnan familiar tenso, y un probabilidad mas halto di comportamento agresivo despues den bida. Leu di mehora disciplina of respet, violencia ta manda e mensahe cu forsa ta un manera aceptabel pa resolve conflicto, reforsando ciclonan di daño a largo plaso.

Muchanan cu discapacidad ta enfrenta riesgonan particularmente halto. Den henter e region, nan tin mas chens di experiencia disciplina violento y mas probablemente di ser someti na creencianan cu castigo fisico ta necesario pa nan criansa. Pa Aruba, unda inclusion y derechonan igual ta prioridadnan di maneho, e hallazgo aki ta subraya e necesidad pa sosten dirigi pa famianan di muchanan cu limitacion.

Pa memey di 2025, 11 pais den Latino America y Caribe a prohibi completamente disciplina violento den tur ambiente, incluyendo cas, scol y cuido alternativo. Otronan a haci compromisonan formal pa sigui. E rapport ta adverti, sinembargo, cu leynan so no ta suficiente. Aplicacion debil, conscientisacion limita, y e exclusion di abuso emocional for di definicionnan legal por laga muchanan sin proteccion.

E cuadro di proteccion di mucha di Aruba ta alinea cu normanan internacional, pero e resultadonan di e rapport ta mustra riba e necesidad continuo pa training profesional, educacion publico y aplicacion consistente. Maestro, dunadornan di cuido di mucha y profesionalnan di salud hopi biaha ta e prome pa nota señalnan di disciplina violento, sinembargo hopi no tin training den strategianan di disciplina positivo.

Programanan di criansa ta surgi como un di e intervencionnan mas eficaz. Evidencia di henter e region ta mustra cu programanan cu ta ofrece dunadornan di cuido hermentnan practico pa maneha stress, pone limitenan, y resolve conflicto sin violencia ta conduci na reduccionnan significante den castigo fisico y psicologico. E programanan aki ta mas efectivo ora nan ta envolve mayor y miembronan di famia extende y ora nan ta adapta na cultura local.

Pa Aruba, integracion di sosten di criansa basa riba evidencia den servicio di infancia trempan, scol y centronan di comunidad por fortalece esfuersonan di prevencion y reduci dependencia riba disciplina punitivo.

E rapport tambe ta enfatisa e importancia di sistemanan di rapport accesibel y amigable pa mucha. Liñanan di ayudo ta hunga un rol crucial den permiti mucha y hobennan pa busca ayudo confidencialmente. “Telefon pa Hubentud” na Aruba ta ser menciona como un ehempel regional di un liña di ayudo cu ta duna sosten y ta conecta mucha y hobennan cu ya,a na servicio di proteccion

Mecanismonan asina ta particularmente importante pa atende violencia cu ta sucede den espacio priva, incluyendo disciplina violento. E rapport ta enfatisa cu sistemanan di reportahe mester ta sosteni pa personal capacita, trayectonan di referencia cla, y suficiente recurso pa garantisa cu divulgacion ta conduci na proteccion, y no mas daño.

Aunke Aruba no ta enfrenta e nivelnan extremo di violencia arma cu ta ser mira den partinan di Latino America, e rapport di UNICEF–PAHO ta laga sa bon cla cu violencia contra mucha ta existi a lo largo di un spectrum. Disciplina violento, abuso emocional y exposicion na menasanan por tin impactonan duradero hasta den sociedadnan relativamente sigur.

E evidencia ta mustra cu prevencion ta mas efectivo ora ley, servicio y normanan social ta traha hunto. Cuadronan legal fuerte, sosten positivo di mayornan, cuido di salud mental accesibel, y mecanismonan di raportahe di confiansa ta forma un ambiente protectivo cu ta permiti muchanan lanta liber di miedo.

Pa Aruba e reto ta pa sostene y fortifica e sistemanan aki, sigurando cu progreso ta ser manteni y riesgonan ser atendi trempan. Manera e rapport ta conclui, e hermentnan pa proteha mucha ta existi caba. E tarea awor ta pa aplica nan consistentemente, guia pa dato y evidencia, pa asina cada mucha por lanta sigur.