Den fin di siman, Aruba a disfruta di e presentacion di artista internacional Beéle. A pesar di e exito di e evento aki, riba rednan social un parti di comunidad a reacciona riba e hecho cu e artista internacional a aparece riba escenario humando loke hopi a deduci tabata marihuana.

Den un potret cu varios ciudadano a comparti riba rednan social por a mira e artista Beéle ta huma un sigaria cu hopi a deduci tabata di cannabis. E ciudadanonan aki expresa nan disgusto pa cu esaki, y hasta un persona a entrega un carta oficial na Ministerio Publico (OM) tocante esaki. Di su banda KPA tambe a emiti un declaracion pa aclaria e situacion.

E pregunta principal cu hopi ciudadano a haci ta dicon polis ta midi cu dos liniaal, uno pa localnan y otro pa un artista internacional. Varios ciudadano a expresa nan frustracion pa e hecho cu e artista aki, presentando na Aruba, durante un actividad cu tabata conta cu presencia policial y tambe di mandatarionan, por a cende y huma loke tabata parce un sigaria di marihuana sin ningun tipo di consecuencia.

Un ciudadano a hasta entrega un carta oficial na OM cuestionando e situacion aki. E ciudadano, Max E. Ng, a indica den su carta cu e tabata presente na e festival di dia 7 di juni, durante cual el a disfruta di e ambiente creativo. Pero na mesun el a expresa su preocupacion cu e hecho cu artista Beéle a huma cannabis publicamente, un acto castigabel per e Landsverordening Verdovende Middelen articulo 4, dilanti mas cu 10 mil hende y den presencia di entre otro minister y parlamentario di AVP/FUTURO, y den presencia di hopi polis.

Sinembargo, no tabatin ningun consecuencia legal pa e acto cometi. E ciudadano aki a remarca cu esaki ta crea un mensahe peligroso pa e pueblo di Aruba.

El a splica den su carta cu e legaliteitsbeginsel ta nifica cu den e contexto aki cu ley ta e con e pais aki tin cu ser goberna. “Nos ta un estado di derecho na fin di dia y ningun persona ta superior na e leynan di nos pais,” el a enfatisa.

El a sigui splica cu articulo 1 di e Staatsregeling di Aruba ta determina cu tur hende tin cu ser trata igual den situacionnan igual. Sinembargo, el a indica, den un caso na unda un Arubiano den un situacion menos publico ta huma cannabis, si ta enfrenta un castigo penal. Esaki, el a remarca a causa confusion no solamente p’e, pero pa hopi otro ciudadano.

E ciudadano a cuestiona dicon Beéle si por y localnan no. El a splica cu OM tin e autoridad pa dicidi ki ora si/no y ken si/no nan lo persigui penalmente. El a enfatisa cu toch mester tene cuenta cu e ABBB’s, cual entre otro ta prohibi persecucion arbitrario. Den e caso aki, el a señala, ta hole net detournement de pouvoir, cual ta ora un organo cu un autoridad ta usa esaki pa un otro meta cual e ta destina p’e. “Acaso Beéle ta superior na e leynan di nos pais? Of e ta simplemente superior na e Arubiano cu si mester tene su mes na e reglanan?” el a cuestiona.

El a clarifica cu e no ta insinuando cu Beéle mester a ser aresta publicamente durante e concierto, pero e hecho cu e por comete un crimen den presencia di polis, politico y mas di 10 mil Arubiano, sin cu despues e no ta haya ni sikiera un boet, ta duna un mensahe na pueblo.

E ciudadano aki ta indica cu si e criteria cu OM mara na dje ta ser aplica arbitrariamente, esey ta nifica cu OM ta superior na e leynan di e pais. “Cua consecuencia mara na Ministerio Publico door di no sigui e leynan? Ken lo persigui boso? Boso mes? E hecho aki no ta djis mara na Beéle como artista famoso, si no tambe hopi otro caso lamentabel den cual Ministerio Publico ta abusa di su poder pa persigui ken nan kier, no ken nan mester,” el a enfatisa.

El a sigui bisa cu OM ta mina e confiansa cu ta ser exigi di nan den e contexto di un estado democratico di derecho. “Leynan ta un burla, a lo menos esaki ta e impresion cu ta ser duna. Husticia uniforme ta un concepto abstracto y utopico E pueblo di Aruba merece un hustificacion y mi kier a pidi un tipo di cooperacion pa cu e asunto aki pa clarifica den ki contexto nos lo permiti uso di cannabis,” el a finalisa.

Segun KPA, tabata producto di tabaco
 Di su banda KPA a emiti un declaracion mirando e cantidad di publicacion cu a surgi riba rednan social alrededor di e topico aki.

Den su declaracion, KPA a splica cu di biaha nan a haci un investigacion pa loke ta e hecho aki. Nan a sigui splica cu ayera den oranan di merdia, hefe di Districto di Oranjestad compaña pa su personal, como tambe hefe di departamento di comunicacion di KPA, a sinta na mesa cu e promotor di dicho evento.

KPA a aclaria cu niun rato no tabata papia di un substancia ilegal, pero tabata trata di producto di tabaco. Segun KPA a indica, e promotor di e evento a splica cu esaki ta parti di e artista su show y cu como promotor, nan sa di ley y reglanan cu tin y no lo a permiti esaki.

Tambe a mustra esnan na mesa un comunicado oficial di e manager di e artista, na unda e ta pidi su disculpa y enfatisa cu nan ta reconoce cu como organisador di e evento nan tin un responsabilidad pa cu e publico y specialmente na e generacion nobo (hoben) cu ta sigui e artista en cuestion.

Cuerpo Policial tambe a informa cu nan a sinta na mesa simannan prome cu e evento cu organisador y despues tambe tabatin un di dos reunion cu e stakeholdersnan pa loke tabata e evento aki, mirando e magnitud di hende cu e lo a trece e anochi di e concierto, y Cuerpo Policial a sigura cu a percura pa tin suficiente polis uniforma durante e evento como tambe e parti di Mobile Commando.

Di parti di e organisador a percura pa camaranan den diferente parti di e luga y na cual polis tabatin acceso. KPA a splica cu di parti di e organisador tambe a pone suficiente security na diferente parti di e luga.

“E anochi a bay sin incidente pa loke ta trata e parti di orden publico y seguridad di cada un cu a bin presencia e concierto. Cuerpo Policial Aruba ta enfatisa y recorda cu humamento di marihuana ta ilegal na Aruba. Articulo 4 di Landsverordening Verdovende Middelen,” KPA a finalisa.