(NLTimes) – Votadornan Hulandes ta disgusta cu e proceso di formacion di Gabinete cu ya ta yena cu drama, cuminsando cu solamente dos partido y a perde un informador, esta Hans Wijers, ainda prome cu e combersacionnan substancial a cuminsa. 83% di votadornan ta kere cu e partidonan politico mester pone nan propio interesnan un banda na fabor di e interes nacional, RTL Nieuws a haya den un encuesta di su panel di noticia.
Votadornan ta di acuerdo cu e decision di formacion scout Wouter Koolmees pa cuminsa e combersacionnan cu D66 y CDA, pero nan ta frustra tambe cu partidonan cu ta nenga di traha hunto ya ta strobando e proceso. Lider di VVD, Dilan Yeşilgöz, en particular, ta ser acusa di a pensa mucho riba interesnan di su partido. Remarcabel ta cu un tercera parti di votadornan di VVD ta sinti mescos.
Segun e emisora, hopi votador di derecha ta sostene e coalicion D66, VVD, CDA, y JA21 cu Yeşilgöz ta pushando p’e door di nenga di traha cu GroenLinks-PvdA. Nan ta kere cu e combinacion aki lo ta un coalicion stabiel, hasta si e ta un asiento cortico di un mayoria den parlamento y no ta ni cerca di un mayoria den Senado. Pero votadornan pa D66 y CDA tin duda riba esaki, y como e dos ganadornan grandi den e eleccion, e partidonan aki ta carga hopi peso den e combersacionnan.
Mas o menos dos tercera parti di tur votador ta habri pa nan partido traha cu un partido politico cu ta leu for di nan, basta e resulta den un gobierno stabiel cu por haci progreso riba terenonan manera vivienda, inmigracion y defensa. Partidarionan di e partidonan centrista ta mas habri pa esaki; Votadornan di VVD y JA21 ta mas dividi. Mitar di e votadornan derechista aki ta rotundamente contra di traha cu partidonan leu, hasta si esey lo nifica progreso pa Hulanda, segun RTL Nieuws.
