Thomas Ruiz, secretario di VRA [Vereniging Rijscholen Aruba] durante un rueda di prensa Diamars mainta a trece preocupacionnan di VRA y miembronan dilanti riba aumento di gastonan operacional y varios otro punto. Prijs di cada scol di rijles lo cuminsa conoce aumento, cada uno ta liber pa pone aumento unda e ta haya necesario.
Gastonan operacional manera gasolin ta subiendo drasticamente, na Juni a mira un 32.2 cen pa Liter, y luna pasa un aumento di 14.5 cen pa liter. Piesanan di auto tambe ta un tiki mas caro, labornan di mecanico ta mas caro, awa a caba di subi na 32% y coriente na 23.9%, combustibel tambe ta subiendo y asina por sigui. Tur e gastonan aki subiendo lo bay tin influencia riba e prijsnan operacional pa Rijscholen, no lo ta sorpresa si prijsnan subi.
“Esey ta trece un preocupacion,” segun Sr. Ruiz, agregando cu ‘awendia cos ta preta pa basta hende y si nos compara prijs ultimo cu nos a haya for di nos coleganan di Hulanda, ta papia di 24 les, teoria y 1 praktijk ta costando actualmente na Hulanda 1300 Euro. Na Corsou pa 10 les, 2 di teoria y 8 praktijk ta awor minimo 750.” Na Corsou no tin sistema digitalisa manera na Aruba cu tin sistema oral y digitalisa, e diferencia di Hulanda ta cu eynan ta duna les den un solo idioma [Hulandes] y akinan ta duna les y examen den cuater idioma.
A introduci examen digital a base di proposicion cu VRA a insisti pa yuda den loke tabata e problemanan antes den fecha pa examen, y esaki a yuda masha hopi mes funcionando hopi bon awe. Pero tin mas problema cu a keda cu no a wordo soluciona, un di esakinan ta e servicio cu no ta optimal. E forma con examen pa rijbewijs ta wordo haci den pasado tampoco por continua mas, mester bay den temponan moderno y traha cu tecnologia cu tin existente awor. E pasamento di examen no mester ta trabao di Polis, den Reino Hulandes ta Aruba ta e unico pais cu te ainda Polisnan ta pasa examen pa rijbewijs.
E trabao principal di un Polis ta mantencion di ordo publico y seguridad. Pues esaki ta un discusion cu tin andando pa un tempo caba cu mester bin solucion na dje awor segun VRA ta subraya.
