Aruba, pero tambe otro paisnan di Caribe Hulandes no ta afecta pa e decision di Gobierno Hulandes pa aumenta belasting riba vuelonan di distancia largo. E impuesto, un decision di Gobierno y Parlamento Hulandes ta como parti di maneho di Union Europeo pa combati dañonan ambiental debi na vuelonan distancia largo. E cobranza lo drenta na vigor na 2027.

Despues di hopi negociacion incluso di parti di autoridadnan Arubano, Minister di Finanzas di Hulanda a entrega un proposicion di ley pa trece diferenciacion den e cobranza di e belasting riba vuelo.

Den e proposicion di ley, cu a keda acepta pa Tweede Kamer, a introduci un diferenciacion en bes di un suma fiho pa e belasting nobo basa riba impacto ambiental. Esakinan tur ta pa vuelonan cu tin Amsterdam como destinacion final. Pa calidad y ehecucion di e areglo di diferenciacion, a determina e tarifa a base di lista limitativo di estado y teritorionan segun nan categoria. Asina tin un tarifa pa distancianan largo di 2000 kilometer, di 2000 pa 5500 kilometer y otro cu ta mas cu 5500 kilometer.

Sinembargo e diferenciacion segun distancia ta inclui algun excepcion cu segun e splicacion, ta cuadra cu e deseo pa responde cu relacionnan politico, economico y/of institucional. Esaki ta pa loke ta e clasificacion di tarifa cu ta inclui tur capital di paisnan UPG, esta teritorionan ultraperiferico, cu ta mara na un pais miembro di Union Europeo, ta keda maximalmente 3500 kilometer for di Amsterdam. Den e sentido aki, e parti Caribense di Reino Hulandes ta cay den e categoria aki. A cambio, por ehempel, paisnan manera Tunesia y Algeria, pa motibo di kier cobra e belasting igual pa tur pais den e region Noord di Africa ta paga e mesun tarifa, aunke nan capital ta keda menos di 2000 kilometer for di Amsterdam.

Raad van State, e organo di conseho mas halto di Reino a bisa di ta compronde e escogencia pa un criteria di distancia obhetivo, cu ta inclui algun excepcion. E excepcionnan aki ta pa trata tur pais di Union Europeo, incluso e UPGnan igual. Sinembargo, Raad van State ta puntra di con e aplicacion di e principio di igualdad pa tur pais y teritorio no ta riba un sentido mas amplio. Consecuentemente ta kere cu mester bin un paragraf na nivel di ley Europeo pa splica esaki den e ley, unda ta elabora riba e pregunta si e categorisacion di tarifa pa e paisnan UPG y teritorionan ultramar, LGO, a tuma luga den forma obhetivo y den caso cu tin diferenciacion pa e gruponan aki, con un trato desigual por ta hustifica.

Actualmente e belasting pa bula, cu ta data di 2021, ta 29,40 euro si ta sali di un aeropuerto Hulandes. E proposicion ta pa diferencia e tarifa aki segun distancia cu un suma progresivo, cu ta determina pa e destinacion final di e pasahero. Intencion di e belasting ta pa cubri costonan externo cu ta bin a base di impacto di cambio di clima, efectonan riba salud y molester di zonido. Hulanda ta calcula cu e belasting aki lo produci un suma di 257 miyon euro.

Mester bisa cu aunke cu e ta maneho Europeo, no ta existi un ley Europeo riba tarifanan di belasting pa vuelo. Esaki a duna e legislador Hulandes e espacio pa implementa diferenciacion.

Despues tene cuenta cu conseho di Raad van State, a inclui e paragraf huridico na nivel Europeo, unda a tene cuenta cu e principio di no-discriminacion. Particularmente pasobra aunke cu e paisnan UPG ta cay den e mesun status cu paisnan miembro, nan ta keda na un distancia hopi mas grandi. Por ehempel, Islanan Canaria ta geograficamente cerca di Europa, mientras cu Guyana Frances ta hopi mas leu.

Aunke cu vuelonan largo ta emiti mas CO2, Hulanda a scoge conscientemente pa un excepcion pa paisnan Hulandes den Caribe. Si mester mantene un tarifa mas halto e lo no duna balor na e status unico di e seis islanan den constelacion di Reino Hulandes. Ademas, un tarifa mas halto lo tin efectonan negativo pa economia local di e islanan. Como tal a scoge pa mantene e tarifa di belasting mas abao, a pesar di e distancia geografico. E legislado ta tene na cuenta cu e relacion special y cu e impacto economico di e seis islanan.

E belasting ta conta pa tur compania cu ta bula for di Hulanda, sin importa si ta companianan cu ta registra na e pais of no.

Bon Dia Aruba a tuma contacto cu Sra. Ronella Croes, director di Aruba Tourism Authority riba e diferenciacion den e cobranza di e asina yama ‘vliegtaks’, esta e belasting riba vuelo. Segun e Director di ATA, e entidad a participa activamente den negociacionnan riba impacto di e belasting aki y como tal ta hopi satisfecho cu Gobierno Hulandes a tene cuenta cu e posicion special di entre otro Aruba.