Partido VVD a anuncia cu Sr. Eric van der Burg a keda nombra como Secretario di Estado pa Asuntonan Interno, Relacionnan di Reino y Eficiencia Gubernamental. E ta bira sucesor di Sr. Eddie van Marum.

E noticia a yega como un sorpresa, ya cu den e parti Caribense di Reino tabata anticipa cu e cartera di Asuntonan di Reino lo bay pa partido D66. Sinembargo, den e acuerdo di coalicion esaki a bay pa VVD, y su lider, Dilan Yesilgoz, kende a bira vice-premier y minister di Defensa, a anuncia e nombramento di Van der Burg.

Van der Burg no ta desconoci pa e islanan. Den su funcion como Secretario di Estado pa Asilo y Migracion anteriormente, el a bishita Aruba na 2023. Comunidad local por recorda cu e tempo aya, el a bira malo durante su bishita y a keda hospitalisa brevemente.

Un politico veterano cu decadas di experiencia den administracion publico Hulandes, Van der Burg ta cla pa sirbi den gabinete Jetten. E gabinete nobo, cu ta spera di huramenta dia 23 di februari proximo, ta bay goberna como un coalicion di minoria di D66, VVD y CDA. E nombramento di Van der Burg ta pon’e den centro di un cartera di relevancia directo pa paisnan Caribense dentro di Reino Hulandes, incluyendo Aruba, Corsou y Sint Maarten.

Un politico cu hopi experiencia

Naci na Amsterdam na 1965, Van der Burg ta considera ampliamente dentro di e Partido Popular pa Libertad y Democracia (VVD) como un administrador pragmatico y orienta riba resultado. Su carera politico ta acapara mas di 40 aña, durante cual el a construi un reputacion manera un homber di accion na lugar di un politico puramente retorico. E maneho aki, hopi biaha resumi pa su propio motto, “no palabra sino accion,” ta un tema recurente den su trabao tanto den su rol parlamentario como ehecutivo.

Anteriormente, Van der Burg a fungi como Secretario di Estado pa Husticia y Seguridad den Gabinete Rutte IV, di januari 2022 te juli 2024. Den e posicion aki, e tabata responsable principalmente pa politica di asilo y migracion, un di e carteranan mas compleho y politicamente sensitivo den politica Hulandes. Su mandato tabata marca pa esfuersonan pa trece mas structura y control den fluho di asilo, mientras tabata nabega presion politico intenso y debate publico. A pesar cu e cartera a proba dificil, el a reforsa su perfil como un politico dispuesto pa asumi un cartera dificil y traha pa resultadonan concreto.

Despues di bandona e gabinete, Van der Burg a bolbe Tweede Kamer, unda e tabata miembro di fraccion VVD desde december 2023. Durante su tempo den parlamento, el a actua como vocero den un variedad di asunto, incluyendo Relacion Internacional, Cultura y Asunto Social. En total, el a pasa mas di 790 di como un miembro activo di Tweede Kamer. E periodo aki a permitie expande su enfoke di politica y mantene contacto cercano cu stakeholdernan tnto domestico como internacional.

Un relacion crucial y fragil

Su regreso na e gabinete awo ta yega cu un cartera notoriamente diferente. Como Secretario di Estado pa Relacionnan di Reino, Van der Burg ta bay ta responsable pa maneha y reforsa relacion dentro di Reino Hulandes. Esaki ta inclui cooperacion cu Aruba, Corsou y Sint Maarten, como tambe participacion cu e municipalidadnan special di Hulanda Caribense. E posicion ta hunga un rol clave den discusionnan tocante gobernacion, capacidad administrativo, supervision financiero y confiansa mutuo entre e paisnan di Reino.

Pa VVD, e nombramento di Van der Burg ta señala un escogencia delibera pa experiencia y peso politico den un cartera cu hopi biaha ta rekeri un balansa cuidadoso entre autonomia y responsabilidad comparti.
Relacionnan di Reino historicamente ta un area sensitivo, forma pa areglonan constitucional compleho y realidadnan politico diferente dentro di Reino. E partido ta spera cu Van der Burg lo trece tanto firmesa como pragmatismo den e rol, particularmente den asuntonan manera reforma gubernamental, resiliencia institucional y cooperacion intergubernamental efectivo.

E nombramento ta sigui negociacionnan intenso di coalicion, durante cual VVD a sigura varios posicion clave den e gabinete nobo. Poniendo un figura veterano manera Van der Burg a cargo di Relacionnan di Reino ta subraya e importancia cu e partido ta mara na relacionnan stabiel y constructivo dentro di Reino, specialmente na un momento den cual discusionnan tocante capacidad administrativo, responsabilidad y cooperacion a largo plaso ta keda temanan importante.

Mas leu di politica, Van der Burg ta conoci pa su estilo personal y amigable. E ta gusta cana y core, hopi biaha ta busca relaha den naturalesa, y ta papia di su amor pa musica, particularmente e canticanan di Andre Hazes, segun su perfil riba website di Tweede Kamer. E caracteristicanan personal aki a contribui na su imagen publico como un politico cu ta balora contacto directo cu hende y ta prefera relaciona fuera di situacionnan formal.

Mientras e ta prepara pa asumi su posicion nobo, expectativa ta halto cu Van der Burg ta bay usa su experiencia administrativo y instinto politico pa nabega e aspectonan compleho di Relacionnan di Reino. Pa Aruba y e otro paisnan Caribense, su nombramento probablemente ta bay ser sigui di cerca, ya cu decisionnan na Den Haag ta bay sigui tin implicacionnan directo y tangible den henter Reino.

Netherlands.