War Room 2.0: Exitoso colaboracion entre tur pais den Reino contra crimen di arma di candela

Di 10 te cu 14 di November 2025, analista, specialista riba tereno di informacion y recherche di tur e paisnan den Reino y Hulanda Caribense a traha hunto, den e mesun sala, riba combatimento di crimen di arma di candela.

E resultado: suficiente informacion pa por a inicia tres investigacion penal di delito di arma di candela riba corto plaso, dies producto di informacion y un bista cada bes mas cla di e problematica di arma di candela den Caribe.

War Room 2.0 a enfoca principalmente riba analisis di e patronchinan cu por detecta den transporte, compra y benta, posesion y uzo di arma di candela ora bo compara e diferente islanan. A uza fuente di informacion tanto local como internacional, combinando y suplementando esakinan cu tecnica di inteligencia “open source” (OSINT) y software pa haci analisis di dato. E iniciativa pa organisa e edicion aki di War Room a bini di Colegio di Hefenan di Polis. Organisacion di e evento tabata den man di Interinsulair Informatie Coördinatie Platform (IICP), den colaboracion cu Nationale Politie di Hulanda. E encuentro aki ta sigui e exitoso evento piloto cu a tuma luga na mart di 2025.

War Room 2.0 a conta cu participacion di personal di tur cinco cuerpo policial den Reino, Recherchesamenwerkingsteam (RST), Koninklijke Marechaussee y Kustwacht Caribisch Gebied. Ministerio Publico tambe tabata estrechamente envolvi.

Minister di Husticia di Aruba Arthur Dowers a habri e evento, hunto cu hefe di polis Ramon Arnhem di Cuerpo Policial Aruba, kende a hiba palabra na nomber di Colegio di Hefenan di Polis.

Minister Dowers a expresa su aprecio pa e echo cu ta sigui padilanti cu e iniciativa aki y a mustra riba e importancia di continuidad. Segun Dowers: “Inicia e tipo di proyectonan aki no semper ta facil; logra sigui cu nan riba plaso largo, menos ainda.” E minister a bisa cu e ta sumamente interesa pa mira e productonan cu lo sali for di e edicion aki.

Seguidamente, e hefe di polis a enfatisa e importancia di cooperacion regional. El a bisa: “Pa nos ta un honor cu e di dos edicion aki ta tumando luga na Aruba. Esaki ta no solamente un honor pa Cuerpo Policial Aruba, sino tambe un muestra di confiansa den e colaboracion cu nos como isla a bini ta desaroya cu nos islanan ruman y cu nos partnernan den e ultimo añanan.”

Rafiek Dinmohamed, coordinado di IICP, a reflexiona riba desaroyo di e plataforma. “Na 2024, dia nos a start cu IICP, nos tabatin un vision: e conviccion cu cooperacion policial entre e islanan – miho bisa, entre e paisnan – mester por ta posibel. Entretanto, tiki tiki nos a crece y bira un team dedica di inteligencia interinsular cu diariamente ta colabora, intercambia informacion y genera producto di informacion cu ta contribui na e lucha contra criminalidad den Reino.”

E colaboracion aki ta tumando luga precisamente na momento di un crisis di arma di candela den Caribe. Ultimo añanan, tabatin un aumento bisto den posesion y uzo di arma di candela. Den e siman di e War Room mes a tuma luga un delito grave relaciona cu arma di candela, mustrando con urgente e asunto aki ta realmente. E participantenan a inventarisa mesora ki informacion relevante por wordo compila.

E analisisnan a revela algun patronchi bastante cla. Ta existi un relacion fuerte entre arma y droga. Tambe, a confirma existencia di e dinamica entre arma, droga y banda criminal cu ta wordo señala algun tempo caba den nos region. A constata cu tin diferente persona activo na varios pais di Reino y cu nan ta uza e mesun tipo di ruta‑, facilitado- y structuranan logistico. A identifica indicio nobo, pero tambe informacion cu ta di interes directo pa algun investigacion penal cu ta andando caba.

War Room ta un bon ehempel di colaboracion mas aya cu palabra bunita, colaboracion transforma den echo concreto. Mientras cu e prome edicion a wordo describi como comienso di un etapa nobo di cooperacion den Reino, e di dos edicion aki ta mustra cu, entretanto, e manera di traha aki ya ta bon hancra y dunando resultado. Pa otro aña, ta preparando un edicion mas. Den e cuadro ey, ta trahando riba mas colaboracion cu CARICOM IMPACS pa asina sigui amplia cooperacion na nivel regional.