Diaranson pa mas o menos 18:25 e avion Dash 8 di Wardacosta a detecta un boto piscado chikito cu dos persona a bordo y nan tabata purba hala nan atencion. Na e momento ey e Dash tabata 120 miya nort di Aruba.
E Centro di Rescate (RCC) di Wardacosta na Curaçao, despues di a haya e notificacion di Dash cu nan a tuma contacto inmediatamente cu e barco di Marina Real, Zr.Ms. Groningen cu na e momentonan aki ta patruyando pa Wardacosta, y asina a puntra pa e helicopter bini na e sitio pas asina hisa e dos tripulante for di boto.
Mientras tanto e RCC a tuma contacto cu un boto, S/V Tiarra cu tabata den bisindario pa para cla pa duna asistencia si ta necesario. Esaki wardando yegada di helicopter di Marina Real, e NH 80. E polis na Aruba a wordo notifica pa RCC di e situacion. Polis na su turno a notifica ambulance y hospital.
Seguidamente RCC a tuma contacto cu FDF pa informa tocante un informacion anterior cu a drenta, di perdida di dos piscado cu for di dia 7 di juli a sali cu nan boto piscado, PA SA TOUCHE, anto no a regresa mas. E piscadonan ainda tabata perdi. E descripcion di e barco piscado perdi ta cuadra cu e boto cu Dash a mira.
Despues di a hisa e dos tripulante for di e boto a hiba nan Aruba unda e pikete oficial di Wardacosta y ambulance ta warda cla pa transporta nan pa hospital. E dos nombernan a declara despues cu nan a sali bay pisca cu solamente un compas a bordo y sin GPS. RCC a informa e autoridad na St. Lucia cu a haya e dos piscado.
