Recientemente den medionan di comunicacion social, ciudadanonan a acusa un trahador di Wardacosta, E.N., cu comportamento indebido y falta di integridad. Ayera, Wardacosta a reacciona den un comunicado di prensa, indicando cu nan “ta tumando tur paso pa por yega na medidanan necesario” pa atende e situacion.

Den un website di noticia local, a publica acusacion contra E.N., un trahador di Wardacosta di Caribe Hulandes, indicando cu e tabata actuando indebidamente. Entre otro, a conta cu E.N. ta busca manera pa parti multa pa cosnan chikito, mientras cu su propio comportamento no ta corecto.

Igualmente, a bisa cu E.N. ta tuma represalia contra cualkier persona cu cuestiona su actonan indebido y su falta di integridad. Tur esaki a pone cu un persona, kende a bisa di ta fada di haya multa “inhustamente” pa a yuda un otro persona riba lama, a dicidi di bay confronta E.N.
El a bin hay’e na beach cu algun persona, unda a bin ripara cu e tabata violando varios regla. Entre otro, tabatin su waverunner riba beach, algo cu no ta permiti. Tampoco e waverunnernan tabatin number di registro riba dje. Segun e persona, miembronan di Wardacosta a pasa unda E.N. tabata, pero no a haci ningun control di e situacion. Finalmente, ora E.N. a ripara cu tabata sacando potret di su actonan, el a subi e waverunner pa huy, y a lubida di bisti vest, violando ley.

Segun e medio, tin mas persona a yega di expresa disgusto y a keha di e comportamento di E.N.

Wardacosta a reacciona na e acusacionnan aki mediante un comunicado di prensa.

“E sucesonan cu a tuma lugar den weekend cu a pasa, relaciona cu un miembro di nos organisacion, ta algo serio y e tin tur nos atencion,” Wardacosta a bisa, enfatisando cu “Integridad ta e base di nos trabao di tur dia.”

Ademas, Wardacosta a anuncia cu ta bay tuma medida pa remedia e situacion. “Teniendo esaki na cuenta, nos ta tumando tur paso pa por yega na medidanan necesario, pa atende debidamente cu e comportamento y e actonan cu e persona a comete. Na niun momento nos no ta permiti ni acepta e tipo di actonan aki.”

En conclusion, Wardacosta a enfatisa cu nan ta bay “sigui ehecuta nan trabao cu seriedad y dedicacion manera sa haci tur dia.”