WEB Aruba ta introduci servicio di SMS WEBcheker

‘Desde awe comunidad di Aruba por check su saldo di cuenta di awa na ki momento cu e kier.’ Asina Giovanni Bermudez, manager di sector di distribucion y servicio na cliente di WEB Aruba, a informa awe durante lansamento oficial di WEBchecker. Cu WEBchecker clientenan por manda un SMS cu e palabra ‘saldo’ pa number di telefon 4200 y nan ta ricibi informacion di nan estado di cuenta di awa, inclui e fecha di vencemento. WEBchecker ta forma parti di optimalisacion di WEB su servicio na cliente.

Clientenan cu kier haci uzo di WEBchecker mester registra pa esaki. WEB ta haci esfuerso pa optimalisa su servicio na diferente manera. Asina anteriormente WEB a amplia su orario di oficina y tur dia ta keda habri nonstop. Recientemente WEB a dicidi tambe pa habri su loketnan cada diasabra prome cu e ultimo dia di pago di e cuenta di awa. Carlos Geerman,Chef Front & Back Office di WEB, ta splica cu WEBchecker ta bon pa clientenan cu no a ricibi of a perde nan cuenta di awa. E servicio nobo y gratis, ta ofrece informacion di e cuenta di awa na e momento cu e cliente ta desea esaki. Pues pa esaki clientenan no ta depende di orario di oficina of di disponibilidad di WEB su Call Center. Por lo pronto ta duna e informacion di suma di cuenta cu ta atrasa y caduca, mas e suma y fecha di vencemento di e proximo pago. Pa mas facil WEB a agrega e number di percela; e number aki ta necesario pa haci cualkier pago na WEB.

Den futuro cercano lo por manda notifica clientenan via e WEBchecker na momento cu e proximo cuenta di awa a sali. E ora ey tambe WEB lo por manda otro mensahenan importante pa clientenan via SMS. Clientenan cu ta desea di haci uzo di WEBchecker, mester registra prome. Esey nan por haci di diferente forma. Por haci esaki via webaruba.com, pero tambe via e-mail, Whatsapp of personalmente na loket di WEB na Balashi. Pa por registra pa WEBchecker mester di un ID valido y un copia di e cuenta di awa concerni cu e nomber y adres di e cliente claramente bisto. Por manda potret di e ID valido y di e cuenta di awa pa Whatsapp 565-4200 of 737-4200 of via webchecker@webaruba.com. Tambe por upload e ID valido via e formulario di registracion riba webaruba.com. Finalmente tin e posibilidad pa registra personalmente cu un ID valido y e cuenta di awa na loketnan di WEB na Balashi.

Pa stimula clientenan pa registra prome cu 1 di november proximo, WEB ta rifa diferente premio durante e simannan di e campaña di publicidad, manera bonnan di descuento di awa y como premionan mayor un iPhone 7 y un iPad. Pa mas informacion tocante WEBchecker, por subi WEB su pagina di Facebook of e-mail via info@webaruba.com. Tambe por yama WEB su Call Center na 525-4200.