WEB lo conoce otro cambio di statuut; Gobierno como accionista unico mester por tin bista den maneho di entidadnan publico

Lo bolbe cambia statutonan di WEB pa asina accionista mayoritario haya derecho pa nombra su hunta di Comisario. Esey ta decision di e hunta di Comisario provisional di Utilities a tuma den e dianan aki. Utilities ta e compania madre di WEB, ELMAR y AWSS (Aruba Waste Systems Solutions).

A tuma e paso aki despues cu finalmente a retira e ultimo miembro di e Hunta di Comisario di Utilities, Judith Brigitha, kende no a acudi na e dos reunionnan cu Minister encarga, mr. Arthur Dowers a convoca cu su persona. Brigitha tabata e unico miembro di e hunta cu no a entrega su mesun retiro. Prome cu esey, Nilo Swaen, Robert Maduro y Rafael Croes a manda nan carta di retiro.

Director di Utilities Sr. Anthony ‘Ton’ Rojer a cambia statutonan di WEB dia seis (6) di Februari ultimo cu impacto directo riba e entre otro abilidad di e accionista principal pa nombra su mesun miembronan den e comisariado di e compania di awa y electricidad. Tambe a cambia e codigo di gobernacion corporativo cu actualmente ta den discusion, y a haci’e similar cu esun di Utilities, segun e statutonan ricibi. Y pa motibo cu a cambia e statutonan di tal indole, practicamente a limita e posibilidad di Gobierno como accionista pa determina kende por nombra.

E statutonan nobo di WEB, firma pa notario Chamila Tromp ta yamativo den sentido cu den e prome pagina ta bisa cu autoridad pa cambia statutonan (di WEB) ta regla den articulo 16 inciso 1 di e propio statutonan y cu ta contra reglanan den Codigo Civil (ta reglanan mara na ley, cu ta mara partidonan na momento di cera acuerdonan. Si desvia di e reglanan aki, cualkier acuerdo por ta declara nulo). Den e caso aki, e reglanan ta reconoce cu e Reunion General di Comisario ta e instancia formal pa cambia statuto. Sinembargo, den e statutonan nobo a bisa cu articulo 16 inciso 1 di e statutonan di WEB, unda ta bisa cu e Reunion General no ta autorisa pa cambia statuut, ta un limitacion cu no ta concorda cu ley y como tal ta perde su funcion. Segun Bon Dia Aruba compronde, ta riba e punto aki tin pregunta di parti di accionista unico, cu ta Gobierno.

Ex Prome Minister y actual lider di fraccion di MEP, mr. Evelyn Wever Croes a bisa cu no mester tin preocupacion pa eventual iregularidad ora cu a cambia statuut, ya cu WEB tin un bon codigo di maneho corporativo (corporate governance). E statutonan di WEB ta bisa cu e codigo di maneho corporativo di WEB ta mescos cu esun di Un suUtilities.

Pero ta riba e punto aki cu Hulanda tabata kier pa bin un cuadro formal pa regla con e codigo di maneho corporativo mester ta. E tabata un di e exigencianan den e landspakket y Gobierno di Aruba, dirigi pa Prome Minister Wever Croes a bay de acuerdo y a duna instruccion pa un comision consistiendo di entre otro ex Director di WEB Sr. Jossy Lacle pa traha riba e proyecto di ley. E trabou tabata bou encargo di Profesor Frank Kunneman y a keda cla. Pero Gobierno nunca a sigui a sigui cu e trabou pa presenta e proposicion na Raad van Advies, corda pa mand’e Parlamento. Esaki ta haci cu Aruba ainda ta e unico pais den Reino Hulandes cu no conoce e cuadro legal codigo di maneho corporativo. Aunke tur entidad publico manera Triple A, APA, ATA, Elmar y WEB tin nan propio codigo, e nan no ta formalmente mara na ley.

Di otro banda, e normanan di Codigo Civil ta duna e base si na cua hopi asunto na nivel priva mester cumpli cune. Y ta aki cu e pregunta ta lanta si sin mas por pone stipulacionnan di e Codigo Civil un banda pa por cambia statuut di un compania publico. Por ehempel un stipulacion den e statuut nobo ta cu e instancia cu ta presta WEB placa tin derecho pa apunta miembro pa hunta di e Comisario, cu practicamente ta duna banconan mas poder den maneho di un compania di utilidad cu e propio accionista mayoritario.

Sr. Frank Hoeverts kende awor ta encarga cu e hunta di Comisario di Utilities a mustra cu mientras cu banconan, e financiadornan berdad por tin derecho di sa con ta maneha e compania(nan), realidad ta cu nunca WEB ni Elmar a keda sin cumpli cu obligacionnan financiero. Y ta dificil pa kere cu ta e financiadonan tin mas bista den maneho di e companianan aki cu e propio accionista cu na final ta responsabel.

E hunta di Comisario provisional di Utilities awor lo traha riba cambio di statuut pa despues nombra otro miembro den e hunta di tanto Utilities, WEB y Elmar.

Profesor dr. Kunneman kende ta experto riba e tereno di bon maneho corporativo a yega di bisa cu aunke cu bon gobernacion (publico) y bon maneho corporativo ta parce igual na otro, e diferencia ta sinta cu Gobierno den caso di entidad publico ta tanto e accionista y tin su responsabilidad publico ( mester duna cuenta na Parlamento). Segun e profesor, ta netamente pa e motibo aki cu Gobierno mester actua mucho mas cauteloso, y pa no laga e papel publico pisa mas cu e papel como accionista. Consequentemente Gobierno bou tur circunstancia mester tene regla di fatsoen na cuenta. Bon Dia Aruba lo amplia riba pensamento di dr. Kunneman riba e tema y kico e proposicion di ley riba codigo di maneho corporativo den un proximo edicion.