Un wela cu tabata na estado di su mesun nieta a duna luz algun dia pasa. E muhe Cecile Eledge (61) di Nebraska a pone su mes disponibel pa ta un ‘draagmoeder’ pa su yiu y su pareha.
Tur cos a cuminsa na momento cu Matthew, e yui homber di Cecile hunto cu su pareha Elliot tabata tin e deseo pa tin un yiu. “Mi a bisanan, si boso ta buscando un hende, pensa riba mi, mi lo kier ta esun cu ta carga e embarazo pa boso”, Cecile a comenta den un entrevista.
Pa motibo di su edad y como cu e tin 10 aña cu e no ta fertil mas, asistencia medico tabata necesario. E ruman muhe di Elliot a haci donacion di e ‘webonan’ y hunto cu e sperma di Matthew a haci un in vitro. Ora cu a logra, a pone esaki den e matriz di Cecile y e embarazo a bira un realidad.
Pa Matthew e tabata sinti poco straño na cuminsamento cu su mesun mama ta e draagmoeder. “Nunca mi a pensa cu mi lo mester papia di e matriz di mi mama”, el a bisa. Ora cu e wak bek, e ta hopi orguyoso y gradici na su mama. “Mi mama mester a soporta hopi pa por a duna luz na su mesun nieta.”
Mientras tanto, e baby Uma Louise ya ta un siman bieuw y tur cos ta bayendo bon tanto cu ne como cu wela Cecile. Matthew a comenta cu e di dos nomber di baby Uma ta mesun di dos nomber cu e wela Cecile tin. “Nos tabata kier pa Uma tin un tipo di conexion cu su wela.”
