Lider di Fraccion MEP den parlamento, Evelyn Wever-Croes, a entrega un carta cu un keho formal na presidente di parlamento, Marlon Sneek, despues di un incidente durante e reunion publico dia 10 di juli ultimo, alegando cu a permiti un persona sin credencial di medio di comunicacion ocupa e seccion reserva pa periodista dentro di e sala parlamentario.

Segun e carta manda dialuna na presidente di parlamento, y comparti den medionan di comunicacion local, Wever-Croes ta argumenta cu e incidente ta lanta pregunta mas amplio tocante seguridad, procedura parlamentario y e integridad di acceso na e facilidadnan di prensa usa durante reunion publico.

Den su keho, Wever-Croes ta declara cu durante e reunion dia 10 di juli, Sra. Astrid Vries tabata sinta inicialmente den e galeria publico prome cu move den e seccion reserva pa miembronan di prensa despues. For di eynan, Vries lo a usa su celular pa graba video di e fraccion parlamentario MEP, particularmente di Sra. Wever-Croes.

Wever-Croes ta bisa cu inmediatamente el a cuestiona si esaki ta permiti, y a trece e asunto dilanti durante e reunion. Segun su carta, presidente di parlamento Sr. Sneek a contesta cu Vries ta parti di prensa y ta afilia cu Radio Hits 92.

Pero despues di e reunion, Wever-Croes ta bisa cu el a tuma contacto cu doño di Radio Hits 94 pa verifica e informacion. Hunto cu e keho tin un declaracion por escrito di J. Habibe Broadcasting VBA, fecha 10 di juli, declarando cu Astrid Vries no ta traha cu HIT 92 FM y no ta parti di e organisacion di prensa di e stacion.

E confirmacion aki ta e base di e alegacion di Wever-Croes cu Parlamento lo a duna acceso na e seccion di prensa basa riba informacion incorecto.

E lider di MEP ta argumenta cu e seccion di prensa ta existi specificamente pa periodistanan acredita cu ta cubri proceduranan parlamentario.
Segun Wever-Croes, permiti individuonan sin un rol periodistico pa usa e facilidadnan aki, mientras ta graba miembronan di parlamento, por mina orden, seguridad y integridad di reunionnan parlamentario.


 E ta bisa ademas cu su preocupacion ta su preocupacion ta eleva pasobra, segun e keho, Vries ta asocia publicamente cu e pagina di Facebook, ‘Politica ta Cruel’, cual Wever-Croes ta describi como un plataforma cu frecuentemente ta publica atake personal, intimidacion y comentario ofensivo dirigi contra politico, incluyendo su mes.

E carta no ta alega cu a viola ningun ley, pero ta argumenta cu e circunstancia ta exigi un revision di proceduranan di parlamento.

Den su keho, Wever-Croes ta pidi Sneek pa duna clarificacion tocante varios asunto, incluyendo:
Riba cual base a reconoce Astrid Vies como representante di prensa;
Ki procedura parlamento ta usa actualmente pa duna acceso na seccion di prensa;

Si oficialnan ta verifica cu individuonan realmente ta representa un organisacion di media prome cu permiti nan drenta e area designa pa prensa;

Ki medida ta bay tuma pa sigura cu solamente representantenan di medionan reconoci tin acceso na facilidadnan pa prensa;

Y ki stap ta bay implementa pa preveni incidentenan similar di ripiti den futuro.

Wever-Croes ta conclui su carta bisando cu parlamentarionan mester por eherce nan debernan di manera sigur, independientemente y sin intimidacion, argumentando cu esaki ta rekeri aplicacion consistente y cuidadoso di e reglanan cu ta goberna acceso na facilidadnan parlamentario pa prensa.

El a solicita un contesta por escrito lo mas pronto posible y a manda un copia di e carta na Gobernador di Aruba.

Te ciere di e edicion aki, Sr. Sneek no a responde publicamente na e keho, y no a duna declaracion oficial tocante e acusacionnan conteni den e carta.