Ayera durante un conferencia di prensa Ricardo Arends, coordinador di Wikipedia Riba Aruba, hunto cu Anne Witsenburg, director di Stichting Monumentenfonds Aruba, a anuncia e inicio oficial di e competencia Wiki Loves Monument Aruba 2025.

“Evento aki ta mas cu simplemente un competencia di fotografia, e ta un celebracion di nos cultura, herencia y tambe conocemento liber pa tur hende. Como coordinador di e proyecto Wikiepedia riba Aruba mi ta hopi orguyoso pa comparti e trabou cu nos ta haci pa crea un comunidad activo di Wikipedia riba e isla,” Arends a remarca.

El a splica cu pa medio di e proyecto di Wikipedia Riba Aruba nan ta organisa tayernan pa siña hende con pa contribui, edita y comparti conocemento riba diferente plataforma di Wikimedia.

El a remarca cu un parti importante ta promove e herencia di Aruba y idioma Papiamento pa asina e historia y cultura di Aruba por ser preserva y comparti cu mundo completo.

Arends a enfatisa cu e competencia Wiki Loves Monuments tin un rol special den e mision aki, ya cu e ta e competencia mas grandi na mundo di fotografia dedica na monumento. E competencia ta desde awe 1 di october te 31 di october. Tur hende, sea fotografo profesional of simplemente amante di fotografia por participa den e competencia sacando potret di e diferente monumento rond di Aruba y subi esakinan riba Wikimedia Commons.

“E potretnan aki lo yuda documenta tanto monumentonan protegi como no protegi. Asina e potretnan aki por ser usa libremente riba e plataformanan di Wikimedia, pero tambe diferente plataformanan educativo pa futuro generacionnan,” Arends a subraya.

El a indica cu pa duna extra motivacion e competencia di e aña aki lo tin tambe premionan pa e ganadornan cu por ta sea premio cash y/of vouchers pa diferente actividad.

El a remarca cu e premio ta conta solamente pa e competencia nacional, pues local aki na Aruba. Alabes el a agrega cu un di e ganadornan por ser scogi tambe pa participa den e competencia internacional, pero pa por ser selecta e potret ganador mester cumpli cu e criteria di Wiki Media Commons Future Picture, cu ta inclui, entre otro, cu e potret mester ta di un monumento protegi.

Arends a sigui splica cu den un esfuerso pa haci e participacion mas facil posibel pa ciudadanonan, nan tin tur e recursonan disponibel caba online y por mira tutorialnan simpel di con pa crea un cuenta, con pa subi un potret y hopi mas. Ademas dia 14 di october nan lo organisa un tayer special enfocando riba Wiki Loves Monuments pa yuda tur hende cu nan participacion.

“Tuma bo camara of simplemente bo telefon, bishita e monumentonan bunita cu nos tin na Aruba y comparti bo imagen cu mundo henter. Hunto nos por preserva nos herencia, promove Papiamento y mustra cu Aruba no ta solamente un isla bunita, pero tambe un lugar di conocemento y cultura,” Arends a finalisa.

Di su banda, Anne Witsenburg di Stichting Monumentenfonds Aruba, a splica cu na 2012 e fundacion a cuminsa cu e prome edicion di Wiki Loves Monuments na Aruba y durante añanan nan a ricibi hopi potret bunita di e monumentonan di Aruba.

Pa loke ta e categorianan, el a splica cu tin dos categoria; monumentonan cu ta protegi y monumentonan cu no ta protegi. Monumentonan protegi ta monumentonan cu tin un seyo riba dje. Tin 40 monumento protegi na Aruba na e momento aki y ta reconoce nan door di nan seyo cu ta riba e porta principal di e edificio, den mayoria caso.

El a remarca cu e monumentonan protegi ta monumentonan cu tin por lo menos 50 aña di existencia y nan tin un balor hopi grandi pa pais Aruba. Por ehempel California Lighthouse ta un monumento protegi, como tambe Nicolaas Store na San Nicolas.

“E ta hopi importante cu nos monumentonan ser protegi, pero lamentablemente tin hopi cu no a ser protegi ainda. Pero pa nos, pa Wiki Media pero tambe pa Stichting Monumententfonds Aruba ta hopi importante pa nos tambe sa kico ta un monumento pa bo, kico ta importante pa keda cune pa nos futuro generacionnan. Asina e bo por scoge e monumento, saca potret di dje y asina nos tambe ta siña kico ta importante pa pueblo di Aruba pa conserva nos historia y nos cultura,” el a indica.

Por ultimo Witsenburg a splica cu esaki por ta hopi cos, e por ta un cas di famia cu tin hopi aña den e famia, tin importancia, tin su storianan di hendenan cu a biba den e cas cu a traha rond di e cas, pero tambe por ehempel, e refineria na San Nicolas. “Imagina bo si bo ta drenta San Nicolas y bo no ta wak e schoorsteen largo? Nan ta herencia di Aruba tambe,” el a señala.