Diahuebs mainta un bishitante di Aruba den e grupo di “All things Aruba” riba Facebook a publica varios potret di un baki di sushi canto di lama completamente yen cu sushi, cual a causa reaccionnan di disgusto den comentarionan.
Aki ta trata di un baki di sushi situa na Malmok instala pa e organisacion di reciclahe Plastic Beach Party, unda por mira cu saconan di cuminda y cahanan di cerbes ta ‘overflow’ den e baki, cu hasta algun desperdicio poni banda di dje. Den bisindario di e baki tambe por a mira cantidad di saco, bleki y otro desperdicio tira riba suela.
Segun e usuario, e sushi ta para eynan henter e siman aki cu a pasa. Ora a bay controla e situacion diaranson mainta, ainda ningun limpiesa a tuma luga.
No ta cla si e sushi tabata tira mayormente pa turistanan, aunke esaki ta situa den un area unda hopi turista sa bishita. No obstante, esaki atrobe ta trece dilanti e cuestion di responsabilidad di servicionan di maneho di desperdicio. Tambe e ta subraya e responsabilidad cu ta keda na tur hende pa deshaci di nan sushi den un manera proactivo. Ta berdad cu servicionan di desperdicio ta principalmente encarga pa piki e sushinan aki, pero nos tambe mester tene nos mes responsable pa no empeora e situacion. Por ehempel, si ta mira un baki completamente yen cu ningun caminda pa pone mas sushi, tuma e responsabilidad pa hiba bo sushi cu bo den saco y benta esaki na cas of na un otro baki di sushi publico cu no ta yen.
Sushi cu ta keda para asina por causa disturbio di holor na personanan cu ta pasa banda di e area y tambe ta crea un bista desagradable pa publico. Ademas, sushi tira los ta vulnerable pa biento duro, unda esaki por tumba of move e sushi pa bay den mondi of den lama. Esaki ta causa daño na nos naturalesa y por hinca bestianan den peliger.
Diabierna mainta, rond 10or, un reportera di Bon Dia Aruba a bay averigua si e servicio encarga cu e bakinan aki por a limpia e baki caba, pero a nota cu esaki ainda no a sucede.
